A Brigada Galicia VII (Brilat) despregará a principios de xuño máis de 300 militares no exercicio Strong Lineage 25, que terá lugar en Eslovaquia no marco dunha operación conxunta organizada pola OTAN. A operación, que contará coa participación de forzas de sete países aliados, ten como obxectivo reforzar as capacidades da brigada multinacional e mellorar a interoperabilidade entre os exércitos implicados.
A presenza galega nesta misión está liderada polo xeneral Alfonso Pardo de Santayana Galbis, actual xefe da Brilat, e inclúe persoal destinado na Base Xeral Morillo de Pontevedra. Os efectivos da Brilat compoñen arredor da metade dos 650 soldados despregados polo Exército de Terra español, que se completan con tropas do Rexemento Príncipe de Asturias, o Rexemento Farnesio de Valladolid e outras unidades militares.
O exercicio incluirá tamén o uso de máis de 175 vehículos, tanto de combate como de comunicacións, apoio loxístico e sanitario, así como 40 colectores de equipamento militar. Está previsto o uso de medios aéreos, entre eles helicópteros e drones, xunto con sistemas de mando, control e artillaría antiaérea. O obxectivo, segundo informou o Ministerio de Defensa, é validar a capacidade operativa e de coordinación a nivel de Brigada, segundo os estándares definidos pola OTAN.
A proxección estratéxica do material comezou este venres co embarque no porto de Vigo, mentres que os desprazamentos do persoal terán lugar en tres rotacións nos próximos días, desde os aeroportos de Vigo e Asturias. O retorno está previsto para a segunda metade de xuño.
A operación contará coa presenza dun equipo de verificación da OTAN que avaliará o proceso de escalada operativa das forzas baixo liderado español. Xunto con España participan tamén Eslovaquia, Eslovenia, Portugal, República Checa, Romanía e Turquía, alcanzando un total de 1.900 efectivos despregados no campo de manobras de Lest, en territorio eslovaco. O exercicio enmárcase dentro das políticas de disuasión e defensa da Alianza no flanco oriental europeo.
