Nova repotenciación eólica en Galicia: o parque de Somozas pasará de 81 aeroxeradores a só 9

Naturgy iniciou a repotenciación do parque eólico de Somozas, no Concello das Somozas, que consistirá na redución dos 81 aeroxeradores actuais por 9 máquinas de última xeración. Contará cun investimento de 67 millóns e está previsto que os traballos finalicen a mediados de 2026. Segundo informa a compañía nun comunicado, os traballos implican o desmantelamento das máquinas existentes e a súa substitución por outras novas, "máis modernas e eficientes", así como a restauración ambiental das zonas desafectadas e a modernización da subestación eléctrica.

O proxecto, que está financiado por fondos europeos de Next Generation, reducirá a potencia instalada a 46,4 megawatts en lugar dos 49,6 megawatts iniciais, "pero incrementará a produción anual de enerxía limpa ata os 168 GWh, equivalentes ao consumo eléctrico de aproximadamente 48.000 fogares". O parque ten máis de 25 anos.

Para a delegada de Desenvolvemento de proxectos renovables de Naturgy en Galicia, María Landeira, "a repotenciación de parques eólicos é clave na nosa estratexia de crecemento renovable en Galicia, onde estamos a desenvolver tres proxectos que suporán pasar de 172 a tan só 25 aeroxeradores". "Galicia é unha rexión estratéxica para Naturgy polo seu enorme potencial eólico e o forte vínculo que mantemos con esta comunidade, na que seguiremos impulsando proxectos que contribúan á transición enerxética, mantendo a convivencia coa contorna, como levamos facendo desde hai máis de 25 anos", agrega.

Parque eólico de Somozas, en Vimianzo | Fonte: Naturgy