“Espero que as CC.AA. digan tamén si”, resalta a ministra de Vivenda con vistas á Conferencia de Presidentes

A ministra de Vivenda e Axenda Urbana, Isabel Rodríguez, ten fe en que da Conferencia de Presidentes de mañá saia un acordo cos gobernos autonómicos. Segundo unha carta enviada polo propio presidente do Goberno, Pedro Sánchez, ás CC.AA. con motivo da Conferencia de Presidentes deste venres, o Goberno esixirá ás comunidades autónomas blindar de maneira indefinida a cualificación de vivendas de protección oficial (VPO) para poder acceder aos recursos do Plan Estatal de Vivenda, que para o período 2026-2030 o Executivo quere incrementar ata os 4.000 millóns de euros.

O Plan Estatal de Vivenda vixente caduca o próximo 31 de decembro e o presidente do Goberno propón aumentar a súa dotación de 2.700 a 4.000 millóns de euros. Iso si, o Goberno comprométese a achegar eses 4.000 millóns a condición de que os gobernos autonómicos asuman unha maior corresponsabilidade e achegar polo menos 2.700 millóns de euros, o que equivalería a que as comunidades pasasen de achegar o 25% ao 40%.

Rodríguez defendeu que os presidentes autonómicos "non se deben ás siglas do seu partido, senón aos seus concidadáns, vótenos ou non", e indicou que, como ministra de Vivenda, está tendéndolles a man para ter máis diñeiro, máis recursos, pero "blindando eses esforzos para que mañá non se especule con eles".

"Os votantes do PP teñen fillos e fillas que hoxe non poden vivir nas súas cidades, que non poden comprar unha casa ou que os seus alugueres se comen o 100% dos seus salarios. E por tanto, eu apelo tamén aos presidentes a que atendan aos votantes do Partido Popular que desexan o mesmo que esta ministra", afirmou.

Pola súa banda, o delegado do Goberno en Galicia, Pedro Blanco, pediu ao presidente da Xunta, Alfonso Rueda, que "deixe ao carón intereses partidistas" e aproveite a "oportunidade histórica" da Conferencia de Presidentes desta semana. Alí, o delegado subliñou a necesidade de falar "do que preocupa a Galicia", como é a vivenda, pedindo a Rueda "menos crispación e máis accións".