Einsa Print nas Pontes anuncia un novo ERE e os traballadores convocan unha folga indefinida
Por Europa Press / Redacción | Cobas (Ferrol) | 05/06/2025 | Actualizada ás 12:40
O comité de empresa de Einsa Print nas Pontes, empresa dedicada ás artes graficas, recibiu esta semana a notificación por parte da compañía sobre o inminente inicio dun procedemento de despedimento colectivo, baseado en causas económicas e produtivas. Tras esta comunicación, a representación legal trasladou á asemblea de traballadores, celebrada este mércores, a escasa información dispoñible, "máis aló de que o inicio do período de consultas está fixado para o día 16 de xuño".
Ante o descoñecemento do alcance deste Expediente de Regulación de Emprego (ERE) e coa sospeita de que podería afectar mesmo á totalidade do persoal da factoría, situada no polígono de Penapurreira, os traballadores acordaron convocar unha folga indefinida a partir do 16 de xuño, coincidindo co inicio do período de consultas.
Segundo o sindicato CIG, maioritario no comité de empresa, a compañía "pretende levar a cabo estes despedimentos pouco máis dun ano despois doutro ERE que reduciu á metade o seu persoal" e no medio do período de compromiso de mantemento do emprego recolleito no plan de viabilidade pactado. Esta convocatoria de folga foi referendada pola práctica totalidade do persoal.
