Un urólogo do hospital de Ferrol recibe un premio nacional pola súa investigación sobre novas técnicas de fertilidade masculina

O urólogo do CHUF Guillermo Galdón recibiu, este venres en Cádiz, un premio nacional á mellor tese doutoral pola Asociación Española de Uroloxía, pola súa investigación sobre novas técnicas de fertilidade masculina. Segundo trasladou o Servizo Galego de Saúde (Sergas), o profesional sanitario foi galardoado polo seu estudo sobre infertilidade masculina. O médico iniciou a súa investigación nun centro sanitario dos Estados Unidos e terminouna como residente do CHUF. En concreto, a tese céntrase na síndrome de Klinefelter que é unha alteración cromosómica que afecta a aproximadamente a un de cada entre 500 e 1.000 homes e é a causa máis frecuente de infertilidade masculina.

Tal e como explicou Galdón, na maioría de casos, os pacientes con esta síndrome desenvolven fibrose testicular durante a puberdade que permanece asintomática ata que son adultos, cando se detecta a infertilidade. Por iso, máis do 90 % deles requiren terapias de fertilidade avanzada para conseguir descendencia sa. Con todo, a taxa de éxito para a extracción de espermatozoides nestes pacientes permanece en menos dun 50 %, e as probabilidades de conseguir un fillo san están en ao redor dun 15 %.

Galdón optimizou na súa investigación sistemas de cultivo ata conseguir o crecemento e illamento de células testiculares humanas de pacientes con síndrome de Klienfelter no laboratorio. A continuación, utilizáronas para formar organoides testiculares. Neste caso, os organoides testiculares foron capaces de producir testosterona e producir células semellantes a espermatozoides. "Este é o primeiro rexistro que temos coñecemento sobre propagación e diferenciación in vitro de células testiculares procedentes de suxeitos con esta síndrome, e supón un paso crucial para o desenvolvemento de novas técnicas de fertilidade", destacou o profesional.