Unha muller falecida e varios feridos nun accidente de tráfico en O Pino (A Coruña)
O accidente que se produciu este luns na autovía A-54 saldouse cun falecido e cinco feridos
Por Europa Press / Redacción | A CORUÑA | 16/06/2025 | Actualizada ás 13:15
Unha persoa faleceu e varias resultaron feridas este luns tras un accidente na autovía A-54, ao seu paso polo municipio do Pino (A Coruña), segundo informaron o Consorcio Provincial contra Incendios e de Salvamento e o 061. O accidente produciuse na mañá deste luns, á altura da saída 77, e consistiu nunha colisión entre un turismo e unha furgoneta.
Como consecuencia do impacto, unha muller de 66 anos, de nacionalidade arxentina, faleceu e outras catro resultaron feridas, e foron evacuadas polos profesionais sanitarios. Así, Urxencias Sanitarias-061 confirmou o traslado do cinco feridos ao Complexo Hospitalario Universitario de Santiago. No operativo interviñeron un helicóptero medicalizado, unha ambulancia medicalizada e outras dúas ambulancias máis.
A Garda Civil informou de que a muller falecida usaba cinto de seguridade, e que os condutores deron negativo nas probas de alcol e drogas. Precisou así mesmo que entre os ocupantes do turismo había un neno, que resultou ileso.
