Convocan manifestacións fronte as sedes do PPdeG para o 25 de xuño polo caso Villares

A asociación feminista Marcha Mundial das Mulleres convocou manifestacións para o próximo 25 de xuño fronte ás sedes do PPdeG polo caso de presunta agresión sexual polo que se investiga ao ex conselleiro de Mar da Xunta, Alfonso Villares.

Segundo relatan nun comunicado, hai máis de 10 días que esperan un pronunciamento do Goberno galego "recoñecendo a irresponsabilidade de todo o goberno do PP á fronte da Xunta" tras a rolda de prensa realizada por Villares, despois de notificarse a súa investigación por un delito de agresión sexual.

Naquel momento, lembran, colectivos feministas galegos denunciaban nun comunicado un "lavado de cara" e "conivencia" por parte da Xunta, así como a "complicidade de moitos medios de comunicación, entre eles os medios públicos galegos, contribuíndo a sinalar á agredida e a defender ao acusado e, ao mesmo tempo, a banalizar algo tan grave como a violencia sexual e a violencia machista na súa totalidade".

Por iso, consideran que o feminismo galego debe "rearmarse" e "responder" como noutros momentos da historia "nos que foi necesario responder aos feminicidios, ás inxustizas, aos intentos de desmantelamento de servizos ou de agresións aos dereitos sexuais e reprodutivos".

"Despois de dúas semanas, non só non houbo pronunciamento, senón que tivemos que responder as rúas a dúas feminicidios que o Goberno aínda non recoñeceu oficialmente e onde as institucións centraron o seu discurso en defender a súa acción (dos corpos de seguridade, da administración, da xudicatura) obviando a súa responsabilidade en avaliar incorrectamente o risco, desprotegiendo as vítimas da violencia que acabou co seu asasinato", remarcan.

"Non podemos tolerar seguir vivindo nunha sociedade na que os máximos representantes públicos, encargados de que se respecten os nosos dereitos e de garantir a nosa protección, no canto de pór o foco nos agresores cuestionen o comportamento da vítima, mesmo ata o punto de responsabilizala publicamente do seu asasinato. Se non están capacitados para estar á fronte dun cargo desta magnitude que os cesen ou que dimitan. Non podemos consentir máis agresións", afirman.

O ex conselleiro do Mar, Alfonso Villares / Álvaro Ballesteros / Europa Press