O PPdG advirte ao BNG de que “rompa” co goberno de Sánchez

O presidente da Xunta, Alfonso Rueda, entendeu " perfectamente" que o BNG non acuda á reunión co presidente do Goberno central, Pedro Sánchez, polo que espera que os nacionalistas sexan "coherentes" e "rompan de forma definitiva" co Executivo ata que haxa eleccións. Así o sinalou este mércores en Vigo tras ser preguntado sobre a súa opinión acerca da decisión do Bloque de non acudir ao encontro con Sánchez. Ao seu xuízo, o presidente do Goberno busca "unha especie de lavado de cara", porque "reta a unha moción de censura", xa que lle serviría (de non saír adiante) para "autoratificarse", pero "non se atreve a enfrontarse a unha cuestión de confianza".

"Se o BNG non quere blanquealo, pode empezar por non ir a unha reunión, pero logo non pode apoialo no seu día a día nin probablemente apoialo en moitos gobernos que están en coalición. Pero o primeiro e fundamental é no Goberno central. Agora mesmo é un dos seus apoios", subliñou o líder autonómico. Por todo iso, espera "coherencia" do BNG e que "rompa de forma definitiva" co Executivo ata que haxa eleccións. "Se simplemente é un paripé e evitar unha foto, entón demostrará que unha cousa é o que se di e outra o que se fai", sentenciou.

Todo iso despois de coñecerse este martes que o BNG tampouco acudirá á rolda de contactos cos socios de investidura que convocou o presidente Pedro Sánchez, advertindo os nacionalistas que o Executivo non pode "buscar unha foto" para tentar "blanquear" os casos de corrupción que afectan ao PSOE. A formación nacionalista galega, que tiña cita este mércores co presidente, sostén que esta rolda de contactos é "unha especie de cuestión de confianza abordada de forma individualizada con cada forza política", e considera que ese respaldo debe gañarse con feitos, "non con xestos nin declaracións baleiras".

"Nun momento no que están a saír á luz informacións graves sobre prácticas corruptas vinculadas a membros do PSOE, o Goberno non pode buscar unha foto de respaldo que desvíe a atención ou pretenda diluír responsabilidades", sinalou o deputado Néstor Rego.

CRÍTICAS DE PAULA PRADO

A secretaria xeral do PPdeG, Paula Prado, advertiu este mércores ao BNG que "non basta" con rexeitar a reunión con Sánchez, senón que "o independentismo galego debe pedir a súa dimisión e retirarlle o apoio", porque "todo o que non sexa esixir iso converteraos en cómplices da corrupción". Os populares piden ao Bloque "romper" cos socialistas en concellos e deputacións.

"Non poden ter a cara de dicir que o seu apoio é puntual, cando sustentan a Sánchez día tras día. O BNG e Ana Pontón deben aparcar xa o seu cinismo e deixar de manterse á marxe coma se isto non fose con eles", sinala, nun comunicado.