PPdeG defende a recepción ao representante de Israel a pesar do "xenocidio" en Gaza

O deputado popular Alberto Pazos defendeu este martes ante o Pleno do Parlamento a recepción ao representante da embaixada de Israel celebrada hai algunhas semanas, que levou a cabo "respectando escrupulosamente" o marcado polo Goberno de España e o Ministerio de Exteriores, quen posúen as competencias neste ámbito.

Así defendía a postura popular ante unha proposición non de lei presentada pola deputada nacionalista Iria Taibo, que considera a recepción "un xesto simbólico de apoio totalmente innecesario, indigno e inxusto", que non representa á totalidade das institucións galegas.

Con isto, afea que o PP pense "que as institucións son súas", razón pola cal, apuntou, Alfonso Rueda "non considera que teña que cesar a un conselleiro acusado de agresión sexual". Na mesma liña expresouse a socialista Paloma Castro, que censurou con vehemencia a presenza da vicepresidenta do Parlamento, Elena Candia, na recepción. Considera que se vulnera así a separación funcional e de competencias, así como a neutralidade e transparencia da Cámara. "Supón un uso unilateral e politizado do Parlamento", afea.

"CUMPREN CO ESTABLECIDO POLO GOBERNO DE ESPAÑA"

O deputado popular Alberto Pazos defendeu a recepción e criticou a "incoherencia" da iniciativa, que na súa exposición de motivos acusa o Goberno central de "ser cómplice dun xenocidio, e despois chega á conclusión de que debe ser a Xunta a que se desculpe por cumprir coas súas obrigacións".

Entre esas obrigacións, citou, está a de manter relacións con representantes de todos os países, "sempre en consonancia coas directrices establecidas polo Goberno de España a través do Ministerio de Exteriores". "Trátase de preservar os intereses de Galicia neses lugares sen que iso supoña, en ningún caso, compartir as actuacións ou o réxime do país", afirmou.

Reunión do encargado de Negocios da Embaixada de Israel en España, Dan Poraz, e o director xeral de Relacións Exteriores da Xunta de Galicia, Jesús Gamallo | Fonte: XUNTA