Generali Seguros non reclamará os 10 millóns polo incendio de Pontesa e que pedía ao Concello de Pontevedra

A compañía Generali Seguros, aseguradora da empresa Galigrain, desistiu de reclamar ao Concello de Pontevedra os 10,38 millóns de euros que esixía como compensación por danos e perdas polo incendio da nave da antiga Pontesa, en Ponte Sampaio.

Galigrain é a filial do Grupo Nogar que usaba a nave de Pontesa para almacenar cereais cando ardeu en 2022. A aseguradora comunicou ao Xulgado do Contencioso-administrativo número 2 de Pontevedra a súa intención de non seguir adiante con este procedemento.

A concelleira de seguridade cidadá, Eva Vilaverde, informou desta noticia que ten lugar despois de que a Audiencia Provincial arquivase a causa aberta contra o xefe do operativo de bombeiros que actuou nese incendio, Juan José Graña.

Vilaverde explicou que o goberno local esperaba que a aseguradora desistise desta demanda: "Parecíanos bastante surrealista que se presentasen estas reclamacións" despois de todo o traballo que fixeron alí os bombeiros "e as condicións nas que se mantiña a nave".

Tras o arquivo desta causa, unicamente "queda vivo" un proceso, segundo lembrou Eva Vilaverde. Trátase do impulsado por Galigrain ao solicitar unha indemnización de 1.128.357 euros posto que Allianz, aseguradora da propietaria da nave Itaipu Trade, xa non chegou a reclamar ante o xulgado os 553.000 euros que lle pedía ao Concello.

A tamén tenente de alcalde lamentou que a empresa "siga reclamándolle a este Concello unha responsabilidade patrimonial por un incendio que non causou senón que apagou".

Dous bombeiros traballan na extinción do lume nas instalacións da antiga fábrica de Pontesa, a 7 de novembro de 2022, en Ponte Sampaio, Pontevedra / Beatriz Ciscar - Europa Press. / Europa Press