“230 xornalistas asasinados, 480 feridos e 49 detidos”: o Colexio Profesional de Xornalistas de Galicia denuncia a guerra de Israel en Gaza

O Colexio Profesional de Xornalistas de Galicia denunciou a "guerra contra a verdade" que está a executar Israel en Gaza e reclamou que se "deteña o asasinato de xornalistas, permítase a entrada de informadores internacionais e garántanse as subministracións básicas mínimos para toda a poboación da franxa". Segundo trasladou o organismo nunha nota de prensa, o Sindicato de Xornalistas Palestinos, contabiliza xa "230 xornalistas asasinados, 480 feridos, 49 detidos e 112 instalacións de medios destruídas desde que Israel comezou a súa ofensiva o 7 de outubro de 2023".

Nesta liña, subliñou que as cifras "reflicten de por si que a de Gaza é unha das guerras máis devastadoras da historia para a profesión". A iso súmaselle, engadiron, que os xornalistas locais "están a sufrir fame propiciada polo bloqueo e as políticas do exército invasor que os conduce irremediablemente á morte". Así mesmo, sinalou o "impedimento de acceso á prensa internacional, a eliminación física de centos de xornalistas locais, a censura de contidos e, a propaganda de guerra de Israel". Con todo, salientou que "a comunidade xornalística internacional non pode quedar calada ante un dos maiores atentados contra a profesión", e chamaron a "alzar a voz ata que se deteñan todos os crimes e se garantan os dereitos humanos en Gaza".

Campaña en contra dos xornalistas asasinadas en Gaza por Israel