Pontevedra celebra o Verbena Fest ao pé do río Lérez nunha festa xa consolidada

Foi nun acto no que interviñeron os directores do festival Kin Martínez (Esmerarte) e Marta González (A Gramola), Ramón de Meer, director de Mercadotecnia para España e Portugal de Fillos de Rivera; Rafael Domínguez, vicepresidente da Deputación de Pontevedra; Xosé Manuel Merelles, director da Axencia Galega de Turismo e Miguel Anxo Fernández Lores, alcalde de Pontevedra.

Nela, expuxeron que a organización ultima os preparativos dun festival que, coincidiron todos, está "plenamente consolidado" como "unha referencia" no mapa musical do país.

Segundo destacaron Kin Martínez e Marta González, ao impulsar este festival "tamén estamos a traballar nun proxecto de cidade" ofrecendo un evento que é complementario a outras ofertas musicais que hai en Galicia "e non está fácil porque, a verdade, é que tampouco hai tantos artistas para tantos festivais" de aí a complicación ao configurar un cartel "que sexa o máis exclusivo posible", sinalaron.

Aínda quedan algunhas entradas á venda para gozar dunha programación pensada ao detalle e que reunirá a 19 artistas en dous días consecutivos de música en directo con propostas emerxentes e unha mestura de estilos que abarcan desde o indie, pop, rock e ata rap.

O venres 22 de agosto abrirá o festival cunha xornada que reunirá a algunhas das voces máis recoñecidas do país. Loquillo, Xoel López e Coque Malla lideran un cartel que se completa coas actuacións de Andrés Suárez, Efecto Corredor, Orzán, Terapia de Grupo e Guateque Big Band, combinando o pulso da escena nacional con propostas emerxentes.

A música continuará o sábado 23 cun segundo día de programación encabezado por Álvaro de Lúa, Nil Moliner, Carlos Sadness e YSY A. A xornada do sábado incluirá, ademais, a Malmö 040, Carla Lourdes, Taïn, Mamasución, Javier Lago e Sergio O Indio DJ, nun cartel que reúne diferentes estilos e xeracións nun mesmo espazo.

Marta González lembrou que "como aperitivo ao festival" desde este mércores 20 e ata o sábado 23 de agosto, terán lugar as xa consolidadas 'Sesións Verbeneiras' na Praza Méndez Núñez. Serán tres xornadas de concertos gratuítos con protagonismo para os músicos locais.

INICIO DA PROGRAMACIÓN

Hoxe abrirán a programación Cora e Rukan Blues; o xoves será a quenda de Adrián Torres e Desconcerto, e o sábado, e durante todo o día, a Charanga Alambique estará a encher de música o corazón da cidade e animando o ambiente para recibir a última xornada do festival.

Kin Martínez tamén puxo en valor o movemento económico que xeran este tipo de eventos tanto de maneira directa como noutros sectores alleos á industria de música que ven beneficiados de forma transversal.

Pola súa banda, Ramón de Mer destacou como un acerto que "a combinación da iniciativa pública e privada, cando funciona, nótase moito" e se a isto súmaselle unha localización "extraordinaria" hai unha garantía de éxito.

CONCERTOS XACOBEO

O vicepresidente da Deputación de Pontevedra anunciou que a Bienal de Arte tamén estará presente no Río Verbena para difundir entre os festivaleros esta cita cultural coa arte contemporánea.

Pola súa banda, Xosé Manuel Merelles lembrou que o Río Verbena Fest forma parte dos Concertos do Xacobeo, un programa "amplo e plural" impulsado por Turismo de Galicia, que abarca máis de 150 festivais, ciclos e concertos en 70 localidades, coa participación de máis de 800 artistas internacionais, nacionais e galegos.

Esta iniciativa da Xunta busca apoiar as principais citas musicais de Galicia e ofrecer unha "experiencia cultural diversa para todos os públicos".

Por último, o alcalde de Pontevedra lembrou que as máis de 300 actividades impulsadas polo Concello ao longo de xullo e agosto "maioritariamente son actividades gratuítas". "Estamos a conseguir un equilibrio", dixo, coas iniciativas de pago que amplían a oferta de lecer e cultura na Boa Vila.

Río Lérez ao seu paso por Pontevedra.