A Xunta avala a ampliación de catro granxas de vacún de leite con condicións ambientais

A Xunta deu luz verde ambiental condicionada aos proxectos de ampliación de catro explotacións de gando vacún de leite nos Concellos coruñeses de Sobrado, Frades, Trazo e Tordoia. Tal e como trasladou o Goberno galego nunha nota de prensa, as actuacións analizadas prevén a renovación e ampliación de granxas existentes para que teñan máis capacidade e poidan albergar máis prazas de vacún de leite.

Segundo se conclúe nos informes de impacto ambiental (IIA) emitidos pola Consellería de Medio Ambiente e Cambio Climático -- que serán publicados nos próximos días no Diario Oficial de Galicia (DOG) -- non son "previsibles efectos adversos significativos" sobre a contorna derivados dos proxectos estudados, a condición de que se cumpra cos condicionantes fixados tanto nos documentos ambientais e na restante documentación analizada, como nas resolucións da Xunta".

Así, as avaliacións consideran que ningún dos proxectos vai ter impactos significativos nos distintos ámbitos analizados e que sería viable a súa posta en marcha cumprindo certos requisitos establecidos nos seus respectivos informes con relación a aspectos tales como a protección da atmosfera, poboación e saúde, das augas e leitos fluviais, do chan e das infraestruturas, da xestión de residuos ou do patrimonio natural.

Neste sentido, a emisión dos respectivos IIAs "non exime aos promotores da obrigación de obter todas as autorizacións, licenzas, permisos ou informes que resulten legalmente esixibles para poder desenvolver o proxecto".

Varias vacas leiteiras, da raza bovina frisoa, comen penso e cereais, nas instalacións da granxa, Sociedade Agraria de Transformación (SAT) Irmáns Miguel, a 19 de marzo, en Talavera de la Reina, Toledo | Fonte: Isabel Infantes - Arquivo