Puente anticipa dous anos de problemas na rede ferroviaria e defende a supresión de frecuencias na Gudiña

O ministro de Transportes e Mobilidade Sustentable, Óscar Puente, anticipou que nos dous próximos anos produciranse máis incidencias na rede ferroviaria, ao ter que estrear novos trens que poden dar problemas, ao mesmo tempo que conviven con outros trens vellos que se quedaron obsoletos. Nunha comparecencia no Congreso dos Deputados a iniciativa propia para informar da actual situación dos trens, Puente admitiu esta conxuntura durante os dous próximos anos, pero que ve necesaria para renovar a frota de material rodante e elevar a calidade do servizo a longo prazo.

O ministro lamentou que pasasen 15 anos sen estrear ningún novo tren de longa distancia e mesmo 17 anos no caso das proximidades. E agora que se puxo en marcha o primeiro deses trens, o Avril de Talgo da serie 106 de Renfe, deu problemas. "Recentemente tivemos unha incidencia moi seria nestes trens ao detectar nun unha revisión rutineira algunhas fisuras nos bogies dos trens que serven na liña Madrid-Barcelona, o que nos obrigou a retiralos da circulación, coas afectacións lóxicas que iso supón", explicou.

Con esta experiencia, Puente advertiu de que os novos trens que se empezarán a estrear a partir do ano que vén poden tamén incorrer nese "pecado de mocidade", mentres que os trens máis vellos poden dar problemas pola súa antigüidade. "Quero ser moi cauto porque eu prometíamas moi feliz co tren Avril e logo non foi tanto. Témome que os dous seguintes anos imos atoparnos nas dúas partes da curva, cun material novo que algún problema dará e cun material nos seus últimos anos de vida", argumentou.

Puente adiantou que dos 500 trens novos que se encargaron o ano pasado, os primeiros de proximidade chegarán a principios do ano que vén, a un ritmo de entrega duns dous por semana. No entanto, cre que é necesario incorporar máis trens á frota de Renfe, de forma que xa tivo os primeiros contactos cos fabricantes (esta semana estivo na fábrica alemá de Siemens) para lanzar outro gran encargo.

DEFENDE A SUPRESIÓN DE FRECUENCIAS NA GUDIÑA

Así meso, o ministro de Transportes defendeu a decisión de suprimir frecuencias de alta velocidade ferroviaria na Gudiña e Sanabria; e esgrimiu que, desde que se implantou esta medida, o tráfico de viaxeiros a Galicia aumentou un 40 % con respecto ao pasado ano. "Tiñamos uns trens a Galicia que estaban a empregar uns tempos pouco competitivos. Que fixemos? De todas as frecuencias coas que contaba na Pobra de Sanabria, A Gudiña, suprimimos unha de ida e outra de volta, para ter un tren máis directo. Que conseguimos con iso? Só desde que implantamos esa medida, o tráfico de viaxeiros a Galicia incrementou un 40 % con respecto ao pasado ano", esgrimiu.

O "paradoxal", agregou, é que "na Pobra de Sanabria tamén aumentaron os viaxeiros", unha situación a que atribuíu a que se axustaron os horarios, que agora aos viaxeiros que van visitar Sanabria lles veñen "mellor". Neste punto, Puente defendeu que a alta velocidade "non é un elemento vertebrador da España baleirada". "É un sistema de transporte comercial, non un servizo público. Se para en todas partes non é competitivo. E, se non é competitivo, non serve para os fins que ten previstos", esgrimiu. En termos xerais, Puente destacou que o incremento de viaxeiros no sector ferroviario é "espectacular" en España, especialmente "nalgúns territorios". "Galicia, por exemplo, multiplicou por catro o número de viaxeiros que se moven en tren nos últimos seis anos", exemplificou.

ESTUDO DE PROXIMIDADE PARA GALICIA

Interpelado polo deputado do BNG no Congreso, Néstor Rego, quen pediu apostar polo Corredor Atlántico e lle instou a non "presumir" dun AVE que chegou a Galicia a finais de 2021, Puente recalcou que "se hai unha terra que pode presumir de mellora ferroviaria en España nos últimos anos, esa é Galicia". "En Galicia pasouse de tardar case oito horas en percorrer a distancia entre Madrid e Santiago, a pasar a percorrela en tres", exemplificou, antes de reivindicar que os avances se produciron da man do Goberno que preside Pedro Sánchez, así como os investimentos nas novas estacións da comunidade.

"Nin o Goberno da Xunta (con Alberto Núñez Feijóo á fronte) nin a señora Ana Pastor (como ministra do ramo de Mariano Rajoy) fixeron nada por mellorar as conexións ferroviarias de Galicia co resto da Península. E desde logo nada por mellorar a rede interior ferroviaria de Galicia", agregou, ante a preocupación que Rego manifestou tamén polas proximidades. Neste punto, anunciou que a próxima semana presentará na Cámara baixa as conclusións do estudo de tren de proximidade para Galicia, extremo que aplaudiu a deputada socialista Patricia Otero. Segundo lembrou Otero, redúcense así os prazos que o Goberno manexaba para ter listo o documento, xa que en distintas ocasións manifestara a súa intención de finalizalo cara a finais de ano ou principios de 2026.