Hostalaría carga contra a prohibición de fumar en terrazas

Hostalaría de España cualificou de “desproporcionada” a prohibición de fumar en terrazas incluída no anteproxecto de modificación da Lei Antitabaco aprobado este martes polo Consello de Ministros. A entidade asegura non comprender a medida e advirte de que terá unha eficacia limitada, xa que podería trasladar os encontros con fumadores a domicilios privados, aumentando a exposición ao fume, e fomentar o consumo desordenado nas inmediacións dos locais, con prexuízos para a contorna e os veciños.

A organización sostén que a prohibición suporía tamén un impacto negativo para o turismo e a imaxe internacional de España, ao converterse nunha “excepción” en Europa, onde só Suecia mantén unha restrición similar. Pola contra, lembra que países como Francia optaron por deixar as terrazas fóra das súas limitacións para non prexudicar nin á hostalaría nin ao sector turístico.

Segundo unha enquisa de 40dB xunto con Hostalaría de España, un 69,3% da cidadanía considera máis efectivas as campañas de información que as prohibicións directas. Ademais, máis da metade dos enquisados non ve urxente a medida e un 85,2% anticipa que os fumadores seguirán consumindo nas inmediacións dos locais, dificultando o labor dos traballadores e xerando problemas de convivencia. Máis dun 57% teme, ademais, un “efecto rebote” con maior consumo en espazos pechados.

Por todo iso, Hostalaría de España reclama diálogo coas autoridades e insta o Goberno a reconsiderar a prohibición. O presidente da entidade, José Luís Álvarez Almeida, advertiu de que as terrazas son “un espazo crave para a vida social e económica do país” e pediu que calquera decisión teña en conta o seu impacto en termos de emprego, actividade empresarial, competitividade turística e experiencia da clientela.