A Fiscalía reduce a tres anos a condena para dous acusados de traficar drogas con menores na Pobra

A Fiscalía reduciu a tres anos de prisión a petición de condena para dous homes acusados de vender drogas a estudantes menores de idade na Pobra do Caramiñal entre setembro de 2020 e febreiro de 2021. Inicialmente solicitara seis anos e medio, pero aplicou as atenuantes de toxicomanía e dilación indebida no procedemento, que sufriu atrasos no envorcado dos teléfonos móbiles dos imputados.

Un dos procesados recoñeceu que naquela época se dedicaba á venda de drogas, aínda que negou dar estupefacientes en institutos ou obrigar a menores a participar nas operacións. Con todo, mostrou a súa conformidade coa nova petición de pena, mentres que o segundo acusado mantén a súa defensa e solicita a absolución.

No xuízo, celebrado na Audiencia da Coruña con sede en Santiago, declararon tamén testemuñas e axentes da Garda Civil. Entre elas estivo o menor que denunciara no seu momento ameazas e agresións, aínda que agora afirmou non lembrar moitos feitos e expresou a súa vontade de retirar a denuncia, algo que o xuíz lle aclarou que non depende da súa decisión.