Renfe estuda demandar a Galicia e Castela e León por facerlle perder 3 millóns pola xestión dos incendios
A liña entre Galicia e Madrid estivo cortada durante nove días.
Por Europa Press / Redacción | SANTIAGO DE COMPOSTELA | 10/09/2025 | Actualizada ás 19:53
Renfe está a valorar presentar unha reclamación de responsabilidade patrimonial contra as comunidades autónomas de Galicia e Castela e León, tras perder xunto con Adif tres millóns de euros polos cortes de circulación que tivo que levar a cabo durante 9 días polos incendios de agosto.
Así o anunciou este mércores o ministro de Transportes e Mobilidade Sustentable, Óscar Puente, durante unha nova comparecencia no Congreso dos Deputados, á que asistiu a petición do PP, que quería explicase o que o partido chama o "caos ferroviario".
Puente volveu a pedir perdón polas incidencias na rede, mesmo en modo irónico en nome da presidenta da Comunidade de Madrid, Isabel Díaz Ayuso, e do alcalde da capital, José Luís Martínez Almeida, polo que el chamou o "caos no metro de Madrid", onde levan producindo colas e atrasos durante o últimos tres días a causa do corte dunha liña.
Con todo, ante as críticas do PP por non prestar Renfe o servizo de alta velocidade entre Madrid e Galicia durante nove días de agosto polos incendios, o ministro respondeu culpando a esa Comunidade e á de Castela e León, gobernadas polos 'populares', por non previr a situación dos incendios.
"Renfe está a estudar por primeira vez unha reclamación de responsabilidade patrimonial contra Castela e León e Galicia. Porque non é de recibo que Renfe e Adif tivesen que perder tres millóns de euros durante ese nove días. Hai unhas administracións que teñen que dimensionar un servizo de prevención e de extinción de incendios e non o fixeron e as consecuencias a paga Renfe, e encima temos que escoitarlles dicir que que malas son Renfe e Adif, que durante nove días non prestaron servizo", argumentou Puente.
"SEXAN SENSATOS"
O ministro desvelou que a rede ferroviaria non sufriu danos por eses incendios, pero Renfe non puido operar pola petición dos servizos de emerxencia de cortar a enerxía eléctrica nas vías para que os medios aéreos puidesen sufocar os incendios, o que impedía a circulación dos trens.
Ante a suxestión da oposición de que Renfe tería que pór un servizo alternativo de autobús, Puente explicou que o primeiro día tentouse, pero as estradas tamén estaban afectadas. Ademais, dixo que é "imposible" transportar a todos os viaxeiros desa liña (70.000 persoas nunha semana) en autobuses. "Din que tiñamos que repor un sistema de transporte alternativo no Madrid-Galicia, así, da noite para a mañá. Cada tren ten 500 pasaxeiros, o que supón 10 autobuses. Que cre? Que podemos dimensionar un servizo de autobuses para suplir os nove días que tivemos cortada esa liña? É imposible. Sexan vostedes sensatos", concluíu respecto diso.
