Galicia, a comunidade autónoma que menos tardou en pagar a provedores en xuño: 14,78 días

Galicia foi a comunidade autónoma que menos tardou en pagar a provedores en xuño, 14,78 días. Situouse por baixo da media nacional no Período Medio de Pago a Provedores (PMP), que alcanzou os 27,46 días. Por detrás da galega, sitúanse Estremadura (16,23 días), Andalucía (17,43 días), Castela-A Mancha (17,61 días) e Cantabria (18,43 días). Estas foron as rexións que máis rápido pagaron aos provedores, segundo comunicou este mércores o Ministerio de Facenda.

No lado contrario da lista, houbo catro comunidades autónomas que superaron o prazo máximo establecido na normativa, que son 30 días: a Rexión de Murcia (52,60 días), a Comunidade Valenciana (50,27 días), Baleares (33,53 días) e Asturias (32,44 días). A Cantabria seguíronlle Canarias (20,29 días), Madrid (20,39 días), Aragón (20,48 días), País Vasco (21,66 días), A Rioxa (24,45 días), Navarra (26,17 días) e Castela e León (27,32 días), que acabaron por baixo do período medio de pago.

Por enriba do período medio de 27,46 días --que supuxo unha leve subida de 1,88 días respecto ao mes anterior-- estivo en xuño Cataluña (27,57 días), aínda que se situou por baixo do prazo máximo establecido na normativa. Pola súa banda, o período medio de pago da Administración Central situouse en 23,08 días en xuño deste ano, o que supón un descenso de 2,03 días en relación con maio de 2025, mentres que o relativo ao subsector de Corporacións Locais do segundo trimestre de 2025 alcanzou os 27,66 días, 8,79 días menos que o mesmo trimestre do ano anterior. Por último, o período medio de pago rexistrado nos Fondos da Seguridade Social cifrouse en 9,11 días en xuño, 1,69 días menos que o mes anterior.