A demografía decrecente de Galicia: nacen menos crianzas e morren máis persoas cada ano
O número de bebés nados ata xullo é menor ao de 2024. O número de defuncións ata agosto ascendeu a 22.730 persoas, un 0,27 % máis.
Por Europa Press / Redacción | A Coruña | 17/09/2025 | Actualizada ás 12:45
Galicia rexistrou no mes de xullo 1.172 nacementos, 589 nenas e 583 nenos, segundo os datos de estimación mensual de nacementos publicados este mércores polo Instituto Nacional de Estatística (INE), que expón que, nos 7 primeiros meses de 2025, o número de bebés nados na Comunidade galega supera os 7.700.
Así, en xullo rexistráronse 1.172 nacementos, un 0,03 % menos que en xullo de 2025. Con respecto aos nacementos acumulados no que vai de ano, tampouco hai apenas variación interanual: 7.766 bebés entre xaneiro e xullo de 2025, fronte aos 7.768 nacementos no sete primeiros meses de 2024.
Por provincias, o maior número de nacementos en xullo de 2025 produciuse na provincia da Coruña, 496, que acumula no que vai de ano 3.411 nacementos. En Pontevedra rexistráronse en xullo 412, e naceron no que vai de ano 2.658 bebés; en Lugo houbo 137 nacementos en xullo e rexístranse 925 acumulados; e en Ourense, o número de nacementos en xullo foi de 127 e o acumulado é 771 bebés.
DEFUNCIÓNS
En canto ás defuncións, o INE fai públicos este mércores os datos da última semana do mes de agosto, cando faleceron en Galicia 523 persoas, 263 homes e 260 mulleres. Así, nos primeiros oito meses do ano, o número de persoas falecidas foi de 22.370, un 0,27 % máis con respecto ao mesmo período de 2024.
Por provincias, na Coruña rexistráronse 204 defuncións na semana 35 do ano (104 homes e 100 mulleres), e 9.068 falecementos no que vai de ano. En Lugo rexistráronse 85 defuncións na última semana de agosto (53 homes e 32 mulleres), e 3.401 defuncións acumuladas.
En Ourense, na última semana de agosto houbo 75 falecementos (33 homes e 42 mulleres), e un total de 3.306 persoas falecidas no oito primeiros meses do ano. E en Pontevedra, rexistráronse 159 defuncións na última semana de agosto (73 homes e 86 mulleres), e un total de 6.956 falecementos acumulados.
