A Audiencia Provincial confirma o arquivo da causa contra o alcalde de Sada pola concesión de ‘El Chiringuito’

A Audiencia Provincial da Coruña ratificou o arquivo da querela presentada pola exedil socialista María Pardo contra o alcalde de Sada, Benito Portela (Sadamaioría), e o que fora concelleiro de Urbanismo, Francisco Montouto, en relación coa concesión de explotación de El Chiringuito e coa recuperación da zona de dominio público marítimo-terrestre.

A causa fora xa sobreseída de forma provisional polo Xulgado de Instrución de Betanzos, pero a denunciante recorreu a decisión. O recurso foi agora desestimado pola Audiencia nun auto con data do 22 de setembro, segundo confirmaron fontes xudiciais.

SEN INDICIOS DE DELITO

O tribunal conclúe que non existiron delitos de prevaricación, malversación, suborno nin tráfico de influencias, e que tampouco se produciu perxuízo económico para o Concello. Ademais, entende que o goberno local actuou con dilixencia nun contexto de complexidade administrativa.

"Non podemos considerar que se observaron nos acusados actuacións que non fosen acordes coa situación nin, por tanto, pasividade que poida encadrarse no delito de prevaricación", recolle a resolución.

REACCIÓN DE SADAMAIORÍA

Nun comunicado, Sadamaioría expresou a súa satisfacción polo sobresemento e subliñou que se trataba dunha denuncia "sen fundamento e con fins políticos". "Trátase dun intento máis de empregar a vía xudicial como arma para tratar de expulsar a Benito Portela da Alcaldía ao non ser capaces de facelo mediante as urnas", sinalou a formación.

O grupo incidiu tamén no seu "compromiso coa defensa do interese público e cunha xestión transparente ao servizo dos veciños". "Ese seguirá sendo o noso único obxectivo, por moito ruído ou denuncias infundadas que outros tenten pór no camiño", engadiu.