A Audiencia de Ourense xulgará dúas persoas por unha presunta estafa de máis de 100.000 euros

A Audiencia Provincial de Ourense sentará no banco dos acusados o vindeiro mércores a dúas persoas acusadas de cometer unha estafa continuada contra un veciño, ao que supostamente enganaron mediante falsas compravendas de vehículos e investimentos ficticios. O prexuízo económico inicial foi valorado en 55.700 euros, aínda que a vítima reclama un total de 107.000 euros, cantidade que ambos os procesados chegaron a recoñecer nun documento privado.

Segundo o escrito do Ministerio Fiscal, os feitos arrincan a finais de 2018, cando o principal acusado publicou por Internet a venda dun coche por 2.700 euros. A vítima pagou esa cantidade, mais o vehículo nunca chegou a entregarse. A partir dese momento, os dous procesados aproveitaron a confianza xerada para continuar con outras operacións fraudulentas.

Entre elas figuran a recepción de varios automóbiles para reparacións que nunca se realizaron e novos supostos negocios que consistían na compra de lotes de coches, inmobles e maquinaria agrícola. En realidade, tratábase de manobras para que a vítima realizase transferencias en favor de supostos subastadores inexistentes.

A acusación mantén que a parella sentimental do principal acusado coñecía a totalidade das operacións e utilizaba as súas propias contas bancarias para recibir parte dos ingresos realizados pola vítima, actuando así como cooperadora necesaria.

En marzo de 2023, ambos os acusados chegaron a asinar un acordo privado no que recoñecían unha débeda de 107.000 euros coa vítima. Aínda así, o Ministerio Público considera que se cometeu un delito continuado de estafa.

Por este motivo, solicita para o home unha pena de cinco anos de prisión e para a súa parella de catro anos e seis meses, ademais da obriga de indemnizar conxunta e solidariamente á vítima pola cantidade recoñecida.