A Audiencia de Pontevedra xulgará dous homes por unha suposta estafa na venda dun coche
Fiscalía pide dous anos de prisión e o pago de 14.500 euros á vítima
Por Europa Press / Redacción | PONTEVEDRA | 28/09/2025 | Actualizada ás 16:23
A Audiencia Provincial de Pontevedra celebrará o vindeiro martes, ás 13:00 horas, a vista contra dous homes acusados de estafar a un comprador cun vehículo que nunca chegou a recibir.
Segundo o escrito do Ministerio Fiscal, un dos acusados, en acordo co outro, ofreceu á vítima un Volkswagen Tiguan polo prezo de 16.000 euros. Alegaron que o coche se atopaba en Alemaña e que tardaría tres meses en chegar a Galicia.
Para convencer ao comprador, explicáronlle que se facía un ingreso anticipado, o importe reduciríase a 14.500 euros. A vítima aceptou e realizou a transferencia o 14 de xullo de 2021. Dende entón, non recibiu o coche nin lle foi reintegrado o diñeiro.
A Fiscalía considera que os dous homes actuaron "co ilícito propósito de incrementar inxustamente o seu patrimonio". Por iso, solicita para cada un deles dous anos prisión, inhabilitación especial para o dereito de sufraxio pasivo durante a condena e o pagamento dunha indemnización de 14.500 euros á vítima polo prexuízo económico sufrido.
O tribunal decidirá na sesión do martes se os feitos constitúen un delito de estafa, tal e como sostén o Ministerio Público.
