A Xunta pide que o palangre semipeláxico sexa recoñecido como aparello de anzol

A Consellería do Mar trasladou ao Ministerio de Agricultura, Pesca e Alimentación unha petición para que o palangre demersal ou semipeláxico se inclúa formalmente dentro da clasificación de aparellos de anzol.

Segundo informou a Dirección Xeral de Pesca, Acuicultura e Innovación Tecnolóxica, esta alegación foi presentada á disposición final cuarta do Real Decreto 502/2022, que regula a actividade pesqueira en caladoiros nacionais.

O Executivo galego defende que este tipo de aparello ten unha gran relevancia económica e social en Galicia, polo que precisa dunha regulación propia e diferenciada do palangre de fondo. O obxectivo, sinala a Xunta, é garantir unha explotación racional e sustentable dos recursos mariños, corrixindo a falta de medidas técnicas na normativa estatal e europea.

A proposta baséase, segundo explicou a Consellería, na experiencia acumulada polo sector e a comunidade científica, nos avances tecnolóxicos e na mecanización das embarcacións, así como nos cambios derivados da evolución da actividade pesqueira.

A Xunta tamén reclama que os barcos sen porto base en Galicia, pero que operan en augas do Mar Territorial e da Zona Económica Exclusiva adxacente, se sometan á lexislación autonómica.

En Galicia, a normativa establece para a pesca profesional de recursos mariños vivos un descanso continuado de 48 horas á semana, que non é elixible polo armador, senón fixado para cada arte. A frota galega adoita realizar esa parada durante a fin de semana.

Porén, a Xunta denuncia que existen embarcacións con porto base fóra do territorio galego que traballan nos mesmos caladoiros "sen respectar as regras operativas" de descanso, o que, segundo o Goberno autonómico, xera desigualdades competitivas e afecta á xestión sostida das pesqueiras.