Controlado o incendio de Pantón tras arrasar 1.805 hectáreas
O lume, iniciado o 18 de setembro en Pombeiro, obrigou a activar a situación 2 e mobilizou máis de 300 brigadas, 15 helicópteros e 12 avións
Por Europa Press / Redacción | LUGO | 28/09/2025 | Actualizada ás 13:16
O gran incendio forestal declarado o pasado 18 de setembro na parroquia de Pombeiro (Pantón) quedou finalmente controlado ás 11:41 horas deste domingo, segundo confirmou a Consellería do Medio Rural.
As últimas estimacións cifran a superficie afectada en 1.805 hectáreas, das que 1.517 son arboredos e 288 rasas. Parte do lume chegou a penetrar no veciño concello de Sober, tras cruzar o río Cabe.
A proximidade das chamas ao núcleo de Lornís obrigou durante varios días a manter activa a situación 2, como medida preventiva pola ameaza ás vivendas.
DISPOSITIVO DE EXTINCIÓN
O operativo despregado foi un dos máis amplos da campaña, con 25 técnicos, 264 axentes, 311 brigadas, 169 motobombas, 9 pas e 6 unidades técnicas de apoio, ademais de 15 helicópteros e 12 avións.
Tamén colaboraron efectivos da Unidade Militar de Emerxencias (UME) para reforzar as tarefas de extinción.
Este incendio, un dos máis graves rexistrados en Galicia neste 2025, deixa unha forte pegada na Ribeira Sacra, afectando tanto ao monte arborado como ás zonas de cultivo e de uso tradicional.
