Comeza a campaña de vacinación da gripe e da Covid-19: este é o cronograma que seguirá
A primeira das fases de inmunización comeza este luns coa administración da vacina antrigripal reforzada aos usuarios das residencias de maiores e dos centros de persoas con discapacidade da comunidade.
Por Europa Press / Redacción | SANTIAGO DE COMPOSTELA | 29/09/2025 | Actualizada ás 14:24
O conselleiro de Sanidade, Antonio Gómez Caamaño, e a conselleira de Política Social e Igualdade, Fabiola García, visitaron este luns a residencia Porta do Camiño de Santiago para supervisar o inicio da campaña de vacinación fronte á gripe e a Covid-19 para os usuarios dos centros residenciais. Os conselleiros estiveron acompañados da directora xeral de Saúde Pública, Carmen Durán, do director de Maiores e Atención Sociocomunitaria, Antón Acevedo, e do xerente da área sanitaria de Santiago de Compostela e Barbanza, Ángel Facio.
A campaña de vacinación estenderase ata o próximo 31 de decembro e levarase a cabo de forma progresiva, segundo os distintos colectivos e grupos de idade, ata alcanzar ao conxunto dos grupos de poboación diana. A primeira das fases de inmunización comeza este luns coa administración da vacina antrigripal reforzada aos usuarios das residencias de maiores e dos centros de persoas con discapacidade da comunidade. O departamento sanitario da Xunta introduce este ano como novidade a ampliación das doses de alta carga aos maiores de 70 anos, tras os bos resultados alcanzados no ensaio clínico 'Galflu'.
Así, a partir deste luns, inmunízase tamén ao persoal que traballa nestes centros. A partir do 13 de outubro, a campaña continuará coa vacinación de nenos e nenas con idades comprendidas entre o seis meses e os 11 anos. Neste caso, a vacinación infantil introducirá dúas novidades: por unha banda, a ampliación da vacina da gripe por vía intranasal aos nenos de entre 24 meses e ata os 11 anos; e, por outra, a posta en marcha dun programa piloto de vacinación escolar coa aplicación desta vacina nos propios centros educativos. O alumnado de 55 centros educativos participará nun programa que ten por obxectivo chegar a 19.000 nenos de entre tres e 11 anos (nacidos entre 2014 e 2022). Para o resto de nenos de seis meses a 11 anos, a vacinación facilitarase no seu centro de saúde.
De forma cronolóxica, a campaña continuará o 20 de outubro coa vacinación de diferentes grupos de poboación: persoas de 70 e máis anos, persoas en situación de inmunodepresión e o persoal sanitario e dos servizos de urxencias da comunidade. A partir do 3 de novembro comezará a quenda de inmunización das mulleres embarazadas e tamén dos menores de 60 anos que padezan algunha patoloxía de risco. Unha semana despois, desde o 10 de novembro, será a quenda das persoas con 60 e máis anos, do persoal de servizos esenciais, así como daquelas persoas con exposición laboral. O cronograma completarase a partir do 1 de decembro coa vacinación dos convivintes de persoas de risco e do resto da poboación.
