O Colexio Profesional de Xornalistas de Galicia presenta unha serie de pautas para informar sobre a conduta suicida
O obxectivo é "favorecer unha información adecuada da conduta suicida que axude á prevención dotando á cidadanía dos recursos necesarios para pedir axuda e rompendo cos estigmas e tabús presentes na sociedade"
Por Europa Press / Redacción | SANTIAGO DE COMPOSTELA | 02/10/2025 | Actualizada ás 13:53
O Colexio Profesional de Xornalistas de Galicia e a Xunta presentaron un documento de recomendacións con indicacións prácticas para informar "de maneira responsable" sobre a conduta suicida.
Tal e como trasladou a entidade nunha nota de prensa, a guía reúne distintas pautas a ter en conta desde a comunicación, como mitos a combater á hora de tratar a conduta suicida e definicións de conceptos crave.
Ademais de consellos para saír da crónica de sucesos e converter a información nunha ferramenta de prevención; indicacións sobre a linguaxe adecuada ou teléfonos de axuda. Tamén, inclúe unha ligazón ás recomendacións elaboradas polo Ministerio de Sanidade coa colaboración da Rede de Colexios de Xornalistas, para ampliar información.
Nesta liña, o obxectivo é "favorecer unha información adecuada da conduta suicida que axude á prevención dotando á cidadanía dos recursos necesarios para pedir axuda e rompendo cos estigmas e tabús presentes na sociedade".
Así, a guía foi elaborada por un grupo de traballo no que participaron xornalistas, profesionais da saúde mental e membros da Consellería de Sanidade da Xunta e da Facultade de Ciencias da Comunicación da Universidade de Santiago de Compostela (USC).
