Aberto o prazo de cita previa para lograr a tarxeta de transporte metropolitano 'Xente Nova' para menores de 19 anos

A Xunta activou este venres un servizo de cita previa para obter a tarxeta 'Xente Nova', expedida gratuitamente por Abanca e coa que os mozos de entre catro e 19 anos poderán viaxar gratis no transporte metropolitano a partir do próximo luns.

Segundo recordou a Xunta a través dun comunicado, esta nova iniciativa ofrecerá un máximo de 60 viaxes interurbanas ao mes e tamén permitirá o seu uso para transbordos en autobús urbano, sempre que formen parte do mesmo desprazamento.

Así mesmo, a Administración autonómica sinalou que esperan que os concellos que posúen transporte urbano propio, respondan á petición do Parlamento galego e apliquen esta medida para os desprazamento dentro das principais cidades.

Neste sentido, reiterou que con iso se facilitará o acceso da xuventude aos servizos básicos como a sanidade e a educación. Ademais fomentarase o uso do transporte público, ao tempo que se axuda á economía familiar.

FUNCIONAMENTO

A Xunta detallou que o usuario de 'Xente Nova' debe cargar a tarxeta para os desprazamentos que realice e este diñeiro será reintegrado cada 15 días. Deste modo, producirase a devolución do 100 por cento do importe daquelas viaxes realizadas, ata un máximo de 60 ao mes.

A continuación, a Administración porá a disposición dos usuarios os días 5 e 20 de cada mes a devolución. Así, os consumos realizados entre o 1 e o 15 de setembro devolveranse o 5 de outubro, mentres que os realizados entre o 16 e o 30 de setembro, figurarán a partir do día 20 de outubro.

Dende a data na que se pon á súa disposición, os mozos dispoñen de dous meses para aceptar este reintegro. Para iso terán que confirmar a súa situación nos caixeiros e, ademais, poderán consultar o seu estado na páxina web http://tmg.xunta.gal/consulta-tarxeta. Como medida de promoción, as 50.000 primeiras tarxetas serán entregadas cunha carga inicial de 20 euros.