No PSdeG tamén hai boinas e birretes
O líder do PSdeG non acaba de pechar a estrutura e o organigrama do novo PSdeG. A pesar de ser un home de partido e controlar perfectamente as engranaxes do mesmo non dá coa fórmula axeitada para que non haxa ciumes entre a familia socialista galega...
Por Galicia Confidencial | Galicia | 08/09/2009 | Actualizada ás 09:28
Sen embargo, e a pesar da contestación interna, o novo "vazquismo" conta con apoios importantes, principalmente, nas comarcas do interior. Algúns dos seus principais valedores critican que haxa xente no partido que queira facer valer o seu "pedigrí" fronte as comarcas do interior. "Aquí non hai socialistas de primeira nin de segunda, todos somos do PSdeG, a pesar de que algúns pensen que por estar nunha cidade e ter un grupo de incondicionais xa lle poden impoñer o que queiran á dirección", apunta unha deputada.
Para coñecer a procedencia duns e doutros hai quen, ironicamente, bota man da lingua e fai paralelismos que non son de todo axustados ao sinalar que os principais vazquistas son galegofalantes, fronte aos grandes dirixentes urbanos que falan castelán. Con todo, o certo é que a polarización do novo socialismo entre os rurais e os urbanitas existe, aínda que só se manifeste en determinados puntos, principalmente, en Vigo e A Coruña.
