Seguen os paquetes informáticos de pago na Xunta

Denuncian que a actualización dos sistemas informáticos das Oficinas de Emprego utilizarán sistemas privativos de pago con licenzas de Microsoft, a pesar das promesas de impulsar o software libre na administración.

Por Galicia Confidencial | Compostela | 17/10/2016 | Actualizada ás 14:34

Comparte esta noticia

A Axencia de Modernización Tecnolóxica de Galicia (AMTEGA) iniciou os traballos para renovación  dos sistemas informáticos das oficinas de emprego a finais de 2015. Pero, case un ano despois, os paquetes informáticos seguen sen renovarse completamente porque o Goberno galego podería estar pensando en utilizar sistemas de pago, en concreto Microsoft, en detrimento do software libre.

Unha muller traballa diante de varias pantallas de ordenador
Unha muller traballa diante de varias pantallas de ordenador

É a denuncia que fai a CIG-Administración que asegura que xa se puxo en contacto coa AMTEGA para saber a que era debido o atraso na implantación do novo sistema e para que lles explicaran como vai ser este plan de mellora da infraestrutura. “Dende a AMTEGA, coma noutras ocasións, non obtivemos resposta ningunha. Chegáronos rumores de que se vai actualizar o sistema, mantendo a arquitectura actual e o software privativo de pago de licenzas a Microsoft”, denuncia este sindicato.

Así, critica que non se migrase a unha plataforma de software libre, de acceso universal e cun mantemento e mellora que podería desenvolverse de xeito local cun custo máis reducido. Por iso, alerta aos traballadores deste departamento que “se preparen” porque van ser utilizados como “coelliños de indias”.

Software libre

Nos últimos anos o software libre está gañando cada vez máis peso nos escritorios dos funcionarios da Administración Autonómica. Impulsado pola política de austeridade, moitos dos computadores públicos xa traen de serie o paquete de oficina libre, o antigo Open Office ou o máis actualizado Libre Office. Con todo, malia as súas promesas electorais, o Goberno Galego asemade segue apostando polo paquete privativo e de pago Microsoft Office en determinadas áreas.

Fai dous anos a Xunta pagou 1,9 millóns de euros anuais por tres anos para ter licencias de Microsoft tras anunciar que impulsaría os sistemas libres. Supuña 1,6 millóns menos que os 3,5 millóns que pagou en 2010 por esas mesmas licencias.

Con todo, o Goberno galego segue privatizando determinados servizos informáticos básicos, como é o da seguridade dos seus equipos. Así, hai unha semanas destinaba máis de medio millón de euros a unha empresa que se encargará de realizar auditorías técnicas de seguridade e vixilancia dixital e ciberintelixencia, entre outras funcións, co obxecto de reducir os riscos de ciberseguridade aos que está exposto o Goberno galego.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 2 comentarios

2 Gamela

Pois están incumprindo a súa propia lei o Esquema Nacional de Interoperabilidad entrou en vigor el 1 de xaneiro de 2014 // A ver se alguén os denuncia ante a Comisión Europea !!! http://redesib.formacionib.org/blog...

1 Chupatetos

Non poden deixar de comprar licenzas porque non existe un plan serio de integración de software libre na administración. Fan o que lles digan as consultoras de sempre e que llas venden. En canto a esas consultoras lles veña mellor o software libre e cobrar polo servizo en lugar de polas licenzas, entón, cambiaremos de idea e a seguir chupando do teto!