E Touriño puxo a cada quen no seu sitio

Primeiro para Alberto Núñez Feijóo a quen acusou de "non facer nada" para solucionar a parálise económica da comunidade e agardar que "sexan outros" os que fagan. "Galicia vive unha absoluta situación de parálise e o peor de todo é que este goberno non fai nada para solucionalo", suliñou. Segundo el, as recetas para sair da crise son inversión en política social, infraestruturas e realizar un maior control financieiro.

E en contraposición a esta "parálise" de Feijóo, lembrou os logros que acadou na súa etapa de presidente da Xunta. De feito, nalgún momento pensou que falaba baixo esa condición --'o goberno que presido', dixo ata en dúas ocasións--. Así, asegurou que a finais de 2008 había 900.000 empregos máis que en 2005 e que a inicios do 2007, Galicia acadou a cota mínima de paro da súa historia. Con números e con políticas foi debullando os seus catro anos en San Caetano. Por iso, recomendoulle ao novo presidente galego que se centre nas políticas sociais, na  sociedade do coñecemento e nas infraestruturas.

Novo PSdeG

Logo tivo verbas para Pachi Vázquez, o seu substituto na Secretaría Xeral do PSdeG, a quen lle lembrou que para volver á Xunta en 2013 ten que incidier nos valores da socialdemocracia, no galeguismo e sobre todo, crear un partido cohesionado, unido e vertebrado. "Non vale iso de novos contra vellos, veteranos contra novatos ou ideólogos contra militantes", veu a dicir diante do propio Vázquez, que se atopaba en primeira fila. "Para falar diso xa está o PPdeG e toda a súa maquinaria mediática", dixo sen especificar a que medios de comunicación ou medio de comunicación se refería. Unhas reflexións que causaron un rumor xeral e moitos xestos afirmativos coa cabeza, especialmente, de significativos membros da Fundación Iniciativas 21.

E, finalmente, o ex presidente galego tivo palabras para os seus ex socios de gobernos. Logo de sinalar que tanto o PSdeG coma o BNG están condenados a entenderse para ser unha alternativa ao PP, destacou que ambas as dúas formacións deben de reflexionar sobre o que fixeron durante os últimos meses do bipartito. "Eses desencontros, ese querer facer rede co entramado institucional foi o que ao final nos pasou factura", suliñou. Por io insistiu na reflexión, sobre todo, aos nacionalistas. "Eles levan perdendo apoio elección tras elección e algunha lectura terán que sacar diso", aclarou ao tempo que puntualizou que, con todo, o BNG ten unha "base sólida" de votantes de en torno o 15%. "Por iso hai que contar con eles", aclarou.

Segundo o ex presidente, estes "desencontros" e "gobernos paralelos" foron unha das principais causas da derrota do pasado 1M, pero tamén houbo outras: a crise económica e crer que a vitoria "estaba nas nosas máns". "Confiamonos e pasou o que pasou", aclarou. E aí quedou a súa opinión sobre as causas da derrota. Non houbo palabras para as denuncias que no seu día fixo o PP e apareceron en grandes titulares sobre despilfarro na xunta, custe de audis ou reforma de despachos. "A iso se refire cando fala de confianza de máis", apuntou un espabilado espectador.

Apoios

A sala onde se celebrou a conferencia estaba case chea e nela había caras moi coñecidas do partido socialista. Alí estaban todos os ex conselleiros socialistas arroupando ao seu ex presidente, agás Fernández Antonio, que reside en Madrid, e Ricardo Varela. Por parte da dirección socialista; Pachi Vázquez, Mar Barcón e Fernández Leiceaga. E tamén fieis colaboradores de Touriño como o ex voceiro parlamentario Ismael Rego ou membros de Iniciativas 21 como Rivera Otero ou Fabiola Sotelo.

Á saída do acto, moitas felicitacións e mesmo algún comentario de "presidente, presidente". En pequenos grupos comentábase a "brillante" intervención de Touriño e os "recados" que lle enviou á nova dirección socialista. "A ver se toman nota e comezan a contar xa con el dunha vez", apuntaba un histórico dirixente hoxe apartado das tomas de decisión.