Feijóo eloxia o traballo de Mos polo seu PXOM fronte a quen "culpa aos demais de todo" e con quen é "díficil" traballar

O presidente da Xunta, Alberto Núñez Feijóo, eloxiou o traballo "con rigor" do equipo de goberno de Mos (Pontevedra) para lograr aprobar o seu Plan Xeral de Ordenación Municipal (PXOM) e contrapúxoo a quen "sempre bota a culpa aos demais do que pasa" no seu municipio.

Nun acto no municipio mosense, con motivo da aprobación do documento urbanístico, e no que estivo acompañado pola alcaldesa Nidia Arévalo, e pola conselleira de Medio Ambiente e Ordenación do Territorio, Beatriz Mato, o presidente galego valorou o feito de que esta localidade, despois de anos de traballo, teña por fin un PXOM, resultado dun proceso "participativo".

Así, quixo recoñecer o traballo de "xente que non bota a culpa aos demais" e coa que "si se pode construír". Fronte eles, lamentou que hai quen "sempre bota a culpa aos demais do que pasa no seu municipio, e non é responsable de nada, máis que dos éxitos alleos", porque con eles "é máis difícil traballar", en clara alusión a Abel Caballero, alcalde de Vigo (cidade o último PXOM da cal foi anulado polos tribunais).

Ademais, Feijóo constatou que os municipios con Plan Xeral poden dar "seguridade xurídica" aos investidores e atraer a riqueza económica, mentres que aqueles que non o teñen "están colapsados, non poden edificar, nin dar licenzas, nin asegurar a estabilidade das súas empresas, e teñen un futuro limitado".

PXOM DE MOS

O titular do Executivo galego subliñou que, coa nova ordenación, "Mos cumpre un vello obxectivo", e sinalou que a Xunta de Galicia "segue traballando" para asegurar un urbanismo "transparente, con principios, que poida dar riqueza e benestar" aos municipios.

Así, tras recordar a aprobación de nova normativa, a axilización de trámites e o traballo para ordenar 33.000 núcleos de poboación en Galicia, animou a todos os gobernos locais a sacar adiante os seus plans urbanísticos.

No caso de Mos, destacou que o novo PXOM establece un modelo que prima as vivendas unifamiliares, no que se pasa de 39 a 119 núcleos rurais, cun 6 por cento de solo urbano, un 1,8 por cento de solo urbanizable e un 75 por cento de solo rústico de protección. Así mesmo, indicou, ordénanse as zonas industriais nun municipio no que algunhas empresas estaban en "situación paralegal".

Pola súa banda, a alcaldesa, Nidia Arévalo, sinalou que este mércores é "un día moi importante para Mos" e agradeceu o traballo dos técnicos de urbanismo, tanto municipais como da Xunta. Tamén puxo en valor a "aposta evidente" do goberno galego por este municipio, que quixo recoñecer entregando senllos obsequios (unha ramo de rosas e unha insignia) a Beatriz Mato e a Núñez Feijóo.

Feijóo e a conselleira foron recibidos por todo o equipo de goberno e por un grupo de veciños que se congregaron nas inmediacións da casa do concello de Mos, na fachada da cal colga unha pancarta alusiva á polémica sobre a Área Metropolitana, e na que pode lerse: "Os de Mos non somos menos que os de Vigo. Área Metropolitana si!, pero non así!"