SANTIAGO DE COMPOSTELA | 23/01/2017 | Actualizada ás 17:17 por EUROPA PRESS
Santiago de Compostela acollerá entre o 3 de marzo e o 20 de maio a VIII edición de 'Santiautor', unha proposta "consolidada" que traerá máis de 30 concertos á capital galega cunha ampla representación de artistas galegos e, maioritariamente, mulleres.
Entre os nomes máis destacados do cartel figuran artistas como Rozalén ou Funambulista, que actuarán coa súa banda completa, Luis Fercán ou Pedro Guerra, ademais doutras como Rosana, Guadi Galego, Rosa Cedrón ou Sonia Lebedynski.
Suso Peón, director do evento, destacou durante a presentación do festival que os adxectivos que definen esta edición serán "galego e de mulleres", con 17 de 32 actuacións protagonizadas integramente por artistas femininas e 15 con integrantes da comunidade autónoma.
A propia Rosa Cedrón mostrouse "agradecida e emocionada" por volver tocar no Teatro Principal "tras case 8 ou 9 anos" cunha proposta persoal, ademais da "honra" de participar nunha iniciativa cunha grande representación do papel da muller nas artes.
"Longa vida a Santiautor", aplaudiu, desexando "unha longa, longa vida" a unha proposta "necesaria" para visibilizar o traballo dos artistas galegos.
Pola súa banda, o alcalde de Santiago, Martiño Noriega, destacou este evento "consolidado" no panorama galego e que leva "con orgullo" o nome da capital galega, alcanzando xa un "alto radio de acción" e de "impacto".
Neste sentido, preséntase a súa edición "máis ambiciosa" como referente de público e de artistas, para o que o Concello colaborou mediante asesoramento técnico e cesión de espazos.
32 ACTUACIÓNS
O cartel da VIII edición de 'Santiautor' inclúe un total de 32 actuacións ao longo de tres meses programadas na Sala Sónar, o Auditorio de Galicia, o Teatro Principal e a Sala Capitol.
A organización confía en "superar con creces" o auditorio e resposta obtidos na pasada edición, que se situou entre as 3.000 e as 4.000 persoas ao longo de 25 actuacións.
As entradas poderanse adquirir no propio Teatro Principal ou a través da web de Abanca.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.