Resposta a “ENCE e vasalos”: o eucalipto arde 3,5 veces máis co carballo
A maior asociación ecolóxica do país entra no debate sobre a campaña publicitaria “Datos, non opinións”, que onte debullou GC. Adega responde cun comunicado crítico no que alerta de que “a incidencia do lume nos eucaliptais é máis do triplo que nas frondosas autóctonas”. Ironicamente, o comunicado leva o título “Datos, non manipulacións”.
Por Galicia Confidencial | Santiago de Compostela | 07/07/2017 | Actualizada ás 19:30
ADEGA interpreta que é ENCE a responsábel da campaña pro-eucalipto nalgúns xornais e denuncia os “trucos de trileira” da pasteira. “ENCE e os seus vasalos lanzaron unha campaña ‘informativa’ para desvencellar ao eucalipto da problemática dos incendios”, din os conservacionistas.
Que arde máis, os eucaliptais, os piñeirais ou os bosques caducifolios autóctonos? Tirando de datos oficiais, ADEGA demostra algo evidente, que proporcionalmente os lumes forestais afectan máis aos eucaliptais. “O tipo de árbore que arde en maior proporción é o eucalipto, seguido do piñeiro e por último, as carballeiras e frondosas autóctonas son as menos afectadas polos lumes, estando ademais a maioría destas masas en situación de abandono”, argumentan. Os ecoloxistas aseguran que “A incidencia do lume nos eucaliptais é 3,55 veces maior que no bosque autóctono”.
Sobre a campaña, intentan demostrar que a mente ao poñer o énfase só no abandono do rural, dado que este abandono retroaliméntase coa propia expansión dos ecualiptos.
Por outra banda, informar do nacemento dun foro para o deseño de políticas alternativas de loita contra o lume. Consello Forestal de Galicia -Sindicato Labrego Galego, Amigos da Terra, Federación Ecoloxista Galega, Organización Galega de Comunidades de Montes e Asociación Forestal Frouma son os seus promotores deste grupo crítico coas políticas da Xunta.
