Profesores entregan firmas no Parlamento a prol da Filosofía
A exdeputada do BNG e profesora do IES Politécnico de Vigo, Carme Adán, xunto a outros profesores e profesoras de diversos centros educativos galegos, está impulsando unha campaña de recollida de sinaturas en defensa da permanencia da asignatura de filosofía no ensino medio.
Por Galicia Confidencial | Santiago de Compostela | 28/08/2017 | Actualizada ás 18:22
O obxectivo inicial desta campaña consistía en acadar as 2.500 sinaturas necesarias para que a iniciativa popular fose tramitada como Proposición Non de Lei no Parlamento galego, mais a proposta deste grupo de profesores e profesoras xa sumou máis de 8.000 firmas en dous meses.
O texto insta á Consellería de Educación a “realizar as adaptacións necesarias para incluír na oferta educativa do Bacharelato a obrigatoriedade da Historia da Filosofía como materia troncal”. Asemade, a proposición insta ao Ministerio de Educación “a propiciar nos traballos para o denominado Pacto educativo un debate en profundidade sobre a situación da Filosofía no sistema educativo e a necesidade da súa pervivencia”.
O mércores as 11 rexistrarán as firmas no Parlamento de Galicia.
