Cadea humana en Pontevedra para reclamar o peche de Elnosa

Máis de 300 persoas participaron este sábado na cadea humana convocada pola Asociación pola Defensa da Ría (APDR) de Pontevedra para esixir ao Goberno galego que non conceda a Autorización Ambiental Integrada (AAI) a Electroquímica do Noroeste (Elnosa).

Na protesta, o presidente da APDR criticou que o vicepresidente da Xunta, Alfonso Rueda, asegurase que "se vai a aprobar si ou si", cuestión que considera "un acto de prepotencia a nivel democrático" posto que "se trata dun expediente administrativo que ten o seu curso e está regulado".

Precisamente, en contra desta actitude do Goberno galego, os participantes no acto reivindicativo portaron senllas pancartas nas que se puido ler Non á continuidade de Elnosa na ría. Ademais, os asistentes colocaron nas súas caras caretas estampadas cunha máscara de gas e un molusco contaminado e mostraron lemas coa mensaxe "2018? Agora!.

Entre os asistentes destacou a presenza do alcalde de Pontevedra, Miguel Anxo Fernández Lores, varios concelleiros do BNG de Pontevedra, e a deputada de En Marea no Congreso, Ángela Rodríguez.

PROTESTA ANTE A DELEGACIÓN DA XUNTA

Despois de formar a cadea humana e corear lemas contra a presenza de Elnosa na ría, os participantes na protesta concentráronse ante a Delegación da Xunta en Pontevedra, onde Antón Masa presentou un escrito dirixido á Dirección Xeral de Calidade Ambiental.

A través deste documento, Masa asegurou que "non procede continuar co procedemento da AAI" porque en caso de aprobación "estariase a conceder unha prórroga encuberta da concesión administrativa" dos terreos de dominio público marítimo-terrestre que finaliza o 29 de xullo de 2018.

"Continuar máis aló desa data sería convertela nunha concesión privada para esa empresa", advertiu Antón Masa, que apelou ao cumprimento "da lei, a racionalidade e os desexos da inmensa maioría da poboación".

Desde a APDR denunciaron que existe "moito segredo" por parte de Costas sobre a resolución do expediente de caducidade da concesión e advertiron de "irregularidades" na tramitación da AAI por parte da Xunta.

O PAZO DE LOURIZÁN

Ademais, Masa comparou a actitude de Alfonso Rueda ante a situación de Elnosa coa oferta que o propio vicepresidente da Xunta lle trasladou á Deputación de Pontevedra de financiar a restauración do Pazo de Lourizán con fondos achegados pola empresa Ence. "Que deixe de actuar como recadero de Ence e Elnosa", sinalou o presidente da APDR.

Desde o colectivo ecoloxista volveron a rexeitar esa posibilidade porque, aínda que "hai que arranxalo", Antón Masa propuxo que "se a Xunta non o fai", que sexa a Deputación de Pontevedra a que asuma esa actuación. "E se fai falta un peditorio popular, todos achegaremos, pero non para Ence, senón para uso e goce da cidadanía", concluíu.