O BNG tacha de "inmobilista" e "carente de sensibilidade" o discurso do Rei de España

A portavoz nacional do BNG, Ana Pontón, tachou de "inmobilista e carente de sensibilidade para o momento social e político que se está vivindo" o discurso de Nadal do Rei de España. A través dunha nota de prensa, critica que foi "previsible" e interpreta que defendeu unha idea "desfasada" de Estado español "na que miles de cidadáns non se ven reflectidos".

"Un discurso que non nos representa", censurou Pontón, para quen, en todo caso, as palabras de Felipe VI reafirman o "obsoleta" que está a institución da monarquía e a "necesidade de superar o actual marco".

Por outra banda, considerou que o monarca "perdeu unha oportunidade de recoñecer os seus erros e os erros do Estado español en relación a Cataluña cunha mensaxe que demostra non entender o resultado que democracticamente acaban de decidir os cidadáns a través do proceso electoral".

"Queriamos escoitar unha mensaxe na senda de avanzar no recoñecemento da plurinacionalidade, no recoñecemento das nacións sen Estado e que hai que dar un paso adiante para que esa plurinacionalidade e o recoñecemento dos dereitos desas nacións", subliñou.

"ASUME A TESE DO PP"

Na súa opinión, resulta "evidente" que no aspecto social "o monarca español asume a tese oficial do PP de que a crise está superada" e "non quere ver os graves problemas e desigualdade que seguen existindo".

Tamén lle reprochou que Galicia "estivo ausente do discurso", posto que non houbo "ningunha mención" aos seus problemas. "Un discurso sen a sensibilidade que este momento político require", resumiu.