Ferido un home de 56 anos tras chocar un coche e unha moto en Santiago

Un home de 56 anos resultou ferido na mañá deste martes nun accidente de tráfico rexistrado en Santiago de Compostela, onde chocaron un coche e unha moto.

Segundo a información da Central de Atención a Emerxencias 112-Galicia, o suceso ocorreu pouco despois das 11,30 horas na SC-20, en dirección ao Polígono do Tambre, á altura da rotonda de San Marcos.

Até a zona desprazáronse efectivos da Policía Local e dos Bombeiros da cidade, así como unha ambulancia do 061, que trasladou ao motorista, con diversas fracturas, ao Hospital Clínico de Santiago.