Aberto o prazo das axudas para o fomento da comercialización da artesanía de Galicia
Publicada no DOG a orde con 265.000 euros para feiras, talleres e asociacións do sector artesanal.
Por E.P. | Santiago de Compostela | 21/06/2025 | Actualizada ás 16:47
O Diario Oficial de Galicia (DOG) publicou a orde de axudas 2025 para o fomento da comercialización da artesanía de Galicia a través da que a Consellería de Emprego, Comercio e Emigración reforza o apoio aos concellos para promover a organización de feiras neste ámbito. Ademais dos concellos, tamén poden beneficiarse os talleres artesáns inscritos no Rexistro Xeral de Artesanía de Galicia e as asociacións profesionais e empresariais de artesáns/as.
Do 265.000 euro de orzamento cos que conta esta orde, que ten aberto o prazo de presentación de solicitudes ata o 17 de xullo, 180.000 euros están destinados aos artesáns e artesás, 50.000 aos consistorios e 35.000 ás asociacións.
Con esta nova edición a Xunta fortalece a comercialización dos produtos de marca Artesanía de Galicia e continúa apoiando a asistencia a feiras e a súa organización atendendo á importancia deste sector en Galicia, tanto no ámbito social e cultural como no relacionado coa xeración de emprego e riqueza.
No caso dos concellos, como novidade desta convocatoria, soben as contías máximas de axuda tanto para a organización de feiras monográficas, as que son dun mesmo oficio tradicional, como non monográficas, as que inclúen distintos oficios.
Para as feiras monográficas, a cantidade máxima de apoio sobe a 18.000 euros fronte a anterior, que era de 15.000 e no caso das non monográficas poderá ser de ata 8.000 euros en función da porcentaxe de talleres inscritos no Rexistro Xeral de Artesanía de Galicia que participen. Ata agora a cantidade máxima podía chegar ata os 3.000 euros.
