Representantes galegos avalían as consecuencias do bloqueo de EE.UU. nunha visita a Cuba
A eurodeputada Lídia Senra participa nunha delegación do GUE/NGL para coñecer a realidade cubana.
Por Galicia Confidencial | Bruxelas | 15/02/2018 | Actualizada ás 23:30
As principais das consecuencias derivadas do bloqueo económico imposto polos Estados Unidos de América dende a década dos anos sesenta. Ese é unha das cuestións que quixo amosar o Goberno cubano a unha delegación de eurodeputados entre os que se atopa a galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL) e representante do mesmo na Asamblea Paritaria da Unión Europea para África, Caribe e Pacífico (ACP-UE).
Senra, na compaña de outros oito eurodeputados participa durante esta semana en Cuba nunha xuntanza para coñecer a realidade política e social deste país. Así, mantiveron encontros coa Asamblea Nacional de Poder Popular (ANPP) e co Presidente da Comisión de Asuntos Xurídicos e Constitucionais da ANPP, o deputado José Luis Toledo.
Tamén houbo encontros con representantes do Ministerio de Relacións Exteriores e co Presidente da Comisión de Saúde da Asamblea Nacional, e visitas ao Cardiocentro William Soler e ao Centro Nacional de Cuba para a Educación Sexual. Tamén haberá tempo para unha reunión co Comité Central do Partido Comunista de Cuba.
A delegación concluirá a visita este venres cun intercambio de opinións co Ministerio de Cultura e a Comisión de Educación, Cultura, Ciencia, Tecnoloxía e Medio Ambiente e pola tarde un encontro con organizacións da sociedade civil na Asociación Cubana de Nacións Unidas.
