As exportacións galegas crecen un 8,2% en 2017 e marcan un novo récord histórico

As exportacións galegas creceron un 8,2% en 2017 e alcanzaron os 21.676 millóns de euros, marcando un novo récord histórico por segundo ano consecutivo, segundo destaca a Xunta, a partir dos datos publicados este martes pola dirección territorial de Comercio e ICEX en Galicia e polo Instituto Galego de Estatística (IGE).

O IGE recolle que a taxa anual das exportacións en decembro foi do 13,1%, mentres que no conxunto estatal situouse no 6%. A exportación de combustibles e aceites minerais foi a que tivo unha maior repercusión positiva na variación anual.

Pola súa banda, as importacións aumentaron un 8,9% con respecto a decembro de 2016, debido fundamentalmente ao incremento tamén nas de combustibles e aceites minerais. En España, as importacións repuntaron un 3,6%.

En 2017, a taxa acumulada das exportacións galegas é do 8,2%, mentres que a das importacións, do 10%.

EXPORTACIÓNS

En decembro, en Galicia, as exportacións incrementáronse un 13,1% respecto ao mesmo mes de 2016. Os produtos con maior influencia positiva foron combustibles e aceites minerais (6,3 puntos), seguidos polos vehículos automóbiles; tractores (4,6 puntos) e pezas de vestir e de punto (1,8 puntos). Destacaron tamén aparellos e material eléctrico (0,9 puntos).

Pola contra, os produtos con maior repercusión negativa foron os produtos químicos inorgánicos (-0,4 puntos) e peixes, crustáceos, moluscos, madeira e as súas manufacturas e mobles, cadeiras, lámpadas (-0,3 puntos).

En 2017, as vendas ao exterior de combustibles e aceites minerais e pezas de vestir (tanto as de punto como as outras) foron as que influíron máis no comportamento das exportacións (case 6 puntos), destacando tamén os barcos e embarcacións.

As influencias máis negativas corresponderon basicamente ás exportacións de vehículos automóbiles e tractores (-2,1 puntos).

IMPORTACIÓNS

Os produtos que alcanzaron unha maior repercusión positiva en decembro foron os combustibles e aceites minerais, que, cun peso do 19,7% sobre o total, repercutiron en 6,1 puntos, e os vehículos automóbiles e tractores, que achegaron 4,9 puntos, cun peso do 25,5%.

Pola contra, os produtos que máis negativamente influíron foron as pezas de vestir, non de punto, que cun peso do 3,4% sobre o total, repercutiron en -3,4 puntos, e os peixes; crustáceos e moluscos, que, cun peso de 11,7%, restaron 2,7 puntos á taxa total.

No transcurso deste ano 2017, o incremento nas importacións (10,0%) veu explicado, sobre todo, polo incremento nas compras ao exterior de combustibles e aceites minerais, que repercutiron en 5,9 puntos na taxa de variación total e representaron o 15,1%das importacións.

Subiron tamén, xa en menor medida, as importacións de vehículosautomóbiles e tractores, peixes, crustáceos e moluscos e conservas de carne ou peixe. A maior repercusión negativa foi a das pezas de vestir, non de punto (-1,7 puntos).

POR ZONAS

En decembro, as expedicións dirixidas á UE-28 (78% do total) presentaron unha taxa de variación interanual do 22,3%. Entre os países cos que o peso das exportacións é significativo, só mostran taxas negativas Bélxica e Irlanda. As taxas máis positivas danse en Países Baixos, Polonia, Reino Unido, Romanía, Francia, Grecia, Portugal, e Italia.

No caso das importacións da UE-28, que neste mes de decembro representaron un 56,6%, produciuse un incremento do 18,5%, debido ao incremento das de Alemaña (32,9%), Bélxica (95,3%), Francia (15,4%), Italia (111,1%) e Reino Unido (63,5%). Eslovaquia e Romanía presentan tamén taxas positivas aínda que menos significativas, xa que a súa porcentaxe rolda o 1%.

Con respecto ao resto de países, o informe do IGE destaca o incremento cara a Estados Unidos, Marrocos, OCDE e Mercosur e a caída das dirixidas a Asia. Nas importacións, con todo, sobresaíu o comportamento con Asia, OCDE, OPEP e Mercosur.

No total deste ano 2017, o máis destacable dos intercambios comerciais coa Unión Europea é o comportamento tanto das exportacións, que presentan unha variación do 7,9%, como das importacións (4,7%). Con terceiros países chama a atención o comportamento tanto das exportacións como das importacións con Marrocos e América Latina.

POR COMUNIDADES

O peso de Galicia no conxunto de España, en decembro de 2017, ascendeu ao 8,1% no total de exportacións e ao 5,7% nas importacións, e presentou unhas taxas de variación anual do 13,1% e do 8,9%, respectivamente.

O incremento das exportacións en España no mes de decembro de 2017 (6%) veu explicado pola evolución positiva de Cataluña, Aragón, Andalucía e Galicia, que achegaron en conxunto 5,4 puntos positivos á taxa de variación.

En canto ás importacións, o incremento do 3,6% no conxunto do estado estivo sostido por crecementos en Cataluña, Aragón, Andalucía, País Vasco e Galicia, con 4,7 puntos de achega.

En 2017, as exportacións en España presentaron unha taxa de variación do 8,9%. Todas as comunidades autónomas rexistraron taxas de crecemento positivas excepto Castela e León, Navarra e Cantabria.

Galicia, neste ano 2017, mostrou unha taxa de variación do 8,2%,cun peso 7,8% sobre o total das exportacións. No caso das importacións españolas rexistrouse un incremento do 10,5%. Todas ascomunidades mostraron tamén taxas de crecemento positivas excepto Navarra.

A comunidade galega presentou unha variación acumulada do 10%, cun peso do 5,7% sobre o total das importacións.

EVOLUCIÓN

Na análise temporal en ciclo-tendencia do comercio exterior de Galicia, Estatística observa unha recuperación das taxas de variación interanuais das exportacións desde o segundo trimestre de 2012 até o verán de 2013. Desde finais de 2014, a tendencia é positiva para volver caer a principios de 2017 e manterse estable nos últimos meses.

No perfil das importacións, apunta a unha tendencia ascendente durante o ano 2016 que se volve descendente na primeira metade deste ano 2017 e actualmente está estable.

ICEX

Segundo os datos do ICEX, o superávit comercial de Galicia en decembro foi de 419,8 millóns, cunha taxa de cobertura do 130,7%; o que a sitúa como a comunidade cun dato maior.

Os sectores con maior importancia foron: manufacturas de consumo (30,29%, destacando o sector téxtil-confección), automóbiles (17,19); bens de equipo (13,75%, sobre todo material de transporte por estrada), alimentación (12,42%, en especial produtos pesqueiros) e produtos enerxéticos (11,68%, subsector de petróleo e derivados).

En conxunto, este catro achegaron máis do 85% das exportacións galegas. Ademais, o ICEX destaca o "extraordinario dinamismo" experimentado no mes de decembro polas exportacións de produtos refinados e derivados do petróleo, que creceron un 74,2% respecto de decembro de 2016.

Por provincias, destacou especialmente o peso da Coruña, cuxas exportacións representaron o 52,37% das de toda a comunidade, manténdose como a quinta máis exportadora de España. Mentres que Pontevedra, a oitava, supuxo o 42,03%, Ourense o 2,9% e Lugo o 2,7%.

VALORACIÓN

Pola súa banda, a Xunta, a través dun comunicado, reivindica o "crecente compromiso das pemes coa mellora da súa competitividade" como "unha das claves" que explican estes datos.

Sinalouno o director do Igape, Juan Cividanes, quen visitou esta xornada en Lalín as instalacións da empresa Aliusporta.