O Foro Económico de Galicia estima un impacto limitado dos aranceis de EE.UU. na economía galega

Un informe publicado polo Foro Económico de Galicia sinala que unha eventual subida dos aranceis por parte dos Estados Unidos tería un impacto reducido na economía galega. A análise, elaborada polos economistas Santiago Lago, Fernando González Laxe, José Francisco Armesto e Patricio Sánchez, calcula que a repercusión no PIB galego sería do 0,29 %, unha das máis baixas entre as comunidades autónomas.

O documento basea as súas conclusións nun escenario hipotético no que o Goberno estadounidense aplicase un incremento adicional do 20 % aos aranceis comerciais. Neste contexto, o efecto directo estimado sería do 0,20 %, ao que se sumaría un 0,09 % vinculado ás cadeas de subministración de empresas galegas que traballan con exportadores europeos.

Segundo explican os autores, "as exportacións de Galicia cara a Estados Unidos apenas representan un 0,98 % do seu PIB", unha cifra por debaixo da media española (1,34 %) e moi inferior á doutras comunidades como o País Vasco (2,04 %). A análise tamén recolle que a afectación en Galicia sería menor ca en Cataluña (0,36 %), Andalucía (0,32 %) e País Vasco (0,66 %). Só a Comunidade de Madrid, cun 0,26 %, presentaría un impacto máis leve.

Os responsables do estudo conclúen que "Galicia é unha comunidade autónoma pouco exposta, tanto directa como indirectamente, á ameaza da subida de aranceis por parte do Goberno estadounidense", aínda que matizan que iso "non implica a ausencia total de repercusións".

Ademais da dimensión galega, o informe reflexiona sobre a situación internacional e alerta da crecente inestabilidade global. Os autores subliñan que "a escalada da volatilidade xeopolítica alimenta novos riscos e incertezas", o que, segundo indican, reforza a idea dunha "desarticulación da orde mundial".