Seguen aumentando os traballadores estranxeiros en Galicia, un 3,7% máis en xullo

A Seguridade Social gañou 2.755 afiliados estranxeiros en Galicia durante o mes de xullo, un 3,7% máis que en xuño, ata situarse nos 77.241 traballadores, segundo informou este xoves o Ministerio de Inclusión, Seguridade Social e Migracións.

Este incremento contrasta coa caída rexistrada a nivel nacional, xa que no total de España a Seguridade Social perdeu unha media de 4.667 afiliados estranxeiros en xullo, un 0,15% menos que en xuño, pechando en 3.091.348 ocupados foráneos. Nos últimos 12 meses, Galicia gañou 10.118 contribuíntes estranxeiros, un 15,07% máis, mentres que a subida en todo o país foi do 6,86%, con 198.585 traballadores.

Do total de afiliados foráneos en Galicia, 31.814 están na Coruña, un 3,54% máis que hai un mes, mentres que 23.932 en Pontevedra, subindo un 3,3%. Lugo contabiliza 11.596, un 5,9% máis e Ourense, 9.899, subindo case un 2,6%. Por nacionalidades, 19.802 son de países da Unión Europea e 57.439 extracomunitarios. Ademais, 43.483 son homes e 33.758, mulleres.

O traballador senegalés Assane Camara, xunto con outros traballadores, durante a súa xornada laboral en Cervantes | Fonte: Carlos Castro