O 42 % da facturación industrial galega corresponde a compañías con sede fóra de Galicia
O 18,9 % das persoas ocupadas no sector servizos traballaban ese ano en empresas con sede fóra da comunidade autónoma galega, segundo os indicadores de multilocalización empresarial do ano 2023 que publica este venres o Instituto Galego de Estatística (IGE).
Por Europa Press / Redacción | SANTIAGO DE COMPOSTELA | 03/10/2025 | Actualizada ás 15:42
O 42,4 % do importe neto da cifra de negocios das empresas industriais con actividade en Galicia corresponde a compañías con sede fóra da comunidade, segundo os indicadores de multilocalización empresarial do ano 2023 que publica este venres o Instituto Galego de Estatística (IGE).
Mentres, o 18,9 % das persoas ocupadas no sector servizos traballaban ese ano en empresas con sede fóra da comunidade autónoma galega. Pola súa banda, o 17,8 % do importe neto da cifra de negocios das empresas comerciais con sede en Galicia foi facturado fóra da comunidade. Só o 3,7 % dos ocupados en empresas industriais con sede en Galicia traballaba noutra comunidade no exercicio analizado polo IGE.
REXISTRO MERCANTIL
Por outra banda, o IGE publica tamén este venres datos relativos ao boletín oficial do rexistro mercantil, segundo os cales en setembro se rexistraron en Galicia 313 constitucións de sociedades mercantís, 28 máis que en agosto. En setembro notificáronse 78 disolucións de sociedades mercantís en Galicia, 15 máis que o mes anterior.
