Fracaso da reunión do comité aeroportuario: os concellos falan de "decepción" e a Xunta pide implicación a AENA
A cita serviu para pouco máis que repetir o diagnóstico, xa coñecido, da situación --o empeoramento das cifras nas terminal galegas, a preocupación pola competencia do Porto e a necesidade de coordinación-- e para crear un grupo de traballo que aínda non ten data para a súa primeira reunión.
Por Europa Press / Redacción | VIGO | 03/10/2025 | Actualizada ás 17:35
O comité de coordinación aeroportuaria de Galicia celebrou este venres unha nova reunión, esta vez en Vigo, que culminou sen avances nin acordos significativos, cos representantes municipais falando de "decepción" e a Xunta apelando á implicación de AENA, que se limita a pór en valor os seus investimentos e a lembrar que a promoción turística é unha competencia autonómica.
Así, o encontro durou algo máis de hora e media, e nel participaron o conselleiro de Presidencia, Xustiza e Deportes, Diego Calvo; a alcaldesa de Santiago, Goretti Sanmartín; o concelleiro coruñés de Turismo, Gonzalo Castro; a tenente de alcalde de Vigo e a concelleira de Turismo, María José Caride e Yolanda Aguiar; o delegado do Goberno en Galicia, Pedro Blanco; o secretario xeral de Transporte Aéreo e Marítimo do ministerio de Transportes, Benito Núñez; e o presidente da Confederación de Empresarios de Galicia (CEG), Juan Manuel Vieites. A cita serviu para pouco máis que repetir o diagnóstico, xa coñecido, da situación --o empeoramento das cifras nas terminal galegas, a preocupación pola competencia do Porto e a necesidade de coordinación-- e para crear un grupo de traballo que aínda non ten data para a súa primeira reunión.
O delegado do Goberno en Galicia, Pedro Blanco, explicou que, na reunión, AENA informou sobre os seus investimentos en aeroportos galegos, máis de 130 millóns de euros entre 2018 e 2024, e sobre as liñas de incentivos a compañías para captar novas rutas, e admitiu que tamén "se puxo en evidencia a necesidade de establecer unha coordinación entre administracións" para impulsar novas rutas en Galicia. Con todo, matizou que a promoción turística é unha competencia autonómica, aínda que engadiu que AENA e o Goberno están dispostos a traballar e apoiar a planificación dunha estratexia para mellorar os datos. "Agora é o momento de traballar xuntos", proclamou, e afirmou que a reunión deste venres foi "un primeiro paso" para levar a cabo ese labor conxunto, que se iniciará coa constitución dun grupo de traballo.
REUNIÓN "DECEPCIONANTE" PARA OS CONCELLOS
Todos os representantes municipais coincidiron en cualificar a reunión como "decepcionante". Así, a rexedora compostelá, Goretti Sanmartín, lamentou que a delegación municipal acudía ao encontro "con todas as expectativas", pero atopouse con que "se segue repetindo o mesmo" que se expón nese comité nos últimos dous anos. "Temos un problema importante (...), hai que facer unha planificación a medio prazo do conxunto do sistema aeroportuario galego, que teña en conta a nosa dependencia de voos domésticos, a competencia do Porto e a chegada do AVE", insistiu, antes de repetir que esa estratexia debe facerse con visión de país, superando o "localismo" para que as terminais galegas "non se fagan a competencia entre si", senón que se complementen e busquen a especialización.
Con todo, con este escenario, criticou a "pouca receptividade" de Xunta e Goberno de España para actuar e tomar esta cuestión "coa importancia que ten" e, tras confirmar que Santiago participará no grupo de traballo que se cre, censurou que, no encontro deste venres, nin o goberno galego nin AENA puxeron ningunha proposta sobre a mesa. A tenente de Alcalde de Vigo, María José Caride, pola súa banda, tamén viu "decepcionante" a reunión do comité, aínda que centrou as súas críticas na Xunta de Galicia, porque "non se fai responsable da situación que viven os aeroportos galegos" a pesar de ter as competencias en promoción turística.
A edila viguesa criticou que a Xunta "se pon de perfil" e instou á administración galega a seguir o exemplo doutras Comunidades Autónomas para impulsar todas as terminais e mellorar a oferta turística. "Isto non ten que ver con taxas aeroportuarias nin coa taxa turística, senón con que estamos nun mundo onde hai outros que están a intervir, e nós de brazos cruzados", advertiu. Ademais, acusou a Turgalicia de estar a negociar con operadores para ofrecer servizos desde os aeroportos galegos, e de pechar cinco voos chárter desde Alvedro, e ningún para Santiago ou Vigo. Esta afirmación foi cualificada como "falsa" polo conselleiro Diego Calvo, que matizou que a Xunta negocia con operadores no marco das súas accións de promoción turística de Galicia, pero que son estes os que deciden os aeroportos onde ofrecerán os seus servizos.
O concelleiro de Turismo da Coruña, Gonzalo Castro, tamén manifestou que, "por desgraza", no comité de coordinación séguese falando "do mesmo" dos últimos anos: a necesidade dunha coordinación aeroportuaria "pero sen avances claros". Castro pediu "responsabilidade" a todos os actores implicados, e sinalou a AENA, de quen lembrou que non deixa de ser unha empresa que "non pode asistir impasible a unha perda efectiva de potenciais clientes" que se van desde Galicia ao Porto, e que estimou nuns dous millóns de persoas ao ano, "pola ausencia de coordinación e pola ausencia dunha planificación". No caso da Coruña, lembrou que o Concello está a facer "un esforzo moi importante" na promoción turística con aerolíneas, pero insistiu en que a estratexia debe facerse con perspectiva autonómica. "De nada vale que todos fagamos a guerra pola nosa conta (...), creo que chegou o momento de superar o localismo se queremos que exista un sistema aeroportuario galego merecedor dese nome, que funcione e que poida competir", subliñou.
A XUNTA PIDE A AENA QUE SEXA MÁIS PROACTIVA
O conselleiro de Presidencia, Diego Calvo, remarcou, pola súa banda, que as competencias de coordinación aeroportuaria "son do Estado" e AENA "non se pode limitar unicamente a pór a disposición das distintas aerolíneas unhas infraestruturas". "O papel de AENA ten que ser moito máis proactivo", proclamou, e afeou que o ente público diga que non pode facer "nada" con respecto á subida de taxas aeroportuarias, unhas taxas que, segundo a Xunta, non poden ser as mesmas para todas as terminais, sen ter en conta as súas singularidades. Calvo saudou a creación do grupo de traballo e apelou á importancia de ter máis datos para planificar rutas, e así saber cales son as demandas, como son os fluxos de pasaxeiros, que viaxes fanse, os voos que saen de cada aeroporto ou os custos. Por parte da Xunta, o compromiso foi dar conta do seu investimento en promoción turística para atraer visitantes en orixe.
Pero en todo caso, insistiu en que a iniciativa debe partir de AENA, coa colaboración da Xunta e concellos, e apelou á empresa pública, da que lembrou que obtivo un beneficio de 1.900 millóns en 2024, a explicar que accións prevé levar a cabo ante a 'fuga' de viaxeiros á terminal do Porto. Finalmente, reivindicou que a administración autonómica si está a actuar, coas súas accións de promoción turística, e lembrou que o goberno galego aposta por esa vía, pero non cre na alternativa de "subvencionar asentos" nas compañías de baixo custo. O presidente da patronal galega, Juan Manuel Vieites, demandou tras a reunión "máis complementariedade" e "especialización funcional" dos aeroportos galegos, e valorou o paso que supón crear un grupo de traballo para analizar en profundidade os datos que afectan ás terminais. "O noso gran competidor é O Porto, e aí é onde temos que facer os deberes, coordinados coa Xunta, con axudas para a promoción", proclamou.
