Por Galicia Confidencial | Vedra | 29/03/2018 | Actualizada ás 22:00
7.581 euros. Iso foi o que cobrou Celia A.M. pola organización dos fondos documentais do arquivo municipal de Vedra (A Coruña). Un traballo que realizou nun mes e cinco días e que estaba previsto, inicialmente, en tres meses e medio. Unha cantidade "excesiva" para a oposición que denuncia irregularedades na adxudicación dun contrato negociado sen publicidade tal e como xa publicou GC.
Precisamente, este contrato chegou ao Parlamento. Nunha iniciativa impulsada por En Marea, e apoiada por BNG e PSdeG, todos os grupos da oposición reclamaron que este contrato fora levado ao Tribunal de Contas e á Fiscalía, pero o PPdeG votou en contra.
Así, na Proposición non de Lei instaba á Xunta a controlar por parte da Secretaría Xeral de Cultura o importe e destino deste tipo de subvencións para detectar "anomalías", como aconteceu no caso de Vedra, xa que "levaba incorporada unha proposta nominativa".
CONTROL DE SUBVENCIÓNS
Tamén apostaba por revisar o expediente completo da subvención concedida ao Concello de Vedra, para verificar que documento se achegou e adecuar a subvención da cantidade á carga de traballo. "Neste caso, a axuda que recibiu foi a máxima, 5000 €. Se hai variacións, debe haber minoración", recolle a iniciativa. Ademais, os grupos da oposición instaban a comprobar se o órgano instrutor avaliou a execución das actuacións subvencionadas e requirir, se non o fixo, a xustificación acreditativa.
Por outra banda, solicitaban aos beneficiarios a copia do traballo desenvolvidom, incorporar os datos na páxina web do Portal de Arquivos de Galicia, avaliar as consecuencias que pode ter a alteración do obxecto por parte do Concello e investigar as irregularidades detectadas.
Finalmente, a iniciativa solicitaba abrir no seu caso un procedemento de revisión de oficio das actuacións irregulares e poñer os feitos en coñecemento da Fiscalía e do Consello de Contas.
PROCESO
Foi a comezos do 2016 cando o concelleiro de Cultura de Vedra, Enrique Vázquez Martínez (PPdeG), solicitou unha subvención á Consellería de Cultura para a organización do arquivo municipal. E no proxecto para a realización dese traballo xa figuraba a persoa, con nomes e apelidos, que sería contratada para o mesmo seis meses despois. Unha persoa que a oposición di que está relacionada co voceiro do PPdeG no municipio e que non é arquiveira ou bibliotecaria profesional, senón historiadora.
O Concello de Vedra recibiu esa subvención. En total 7.581 euros, dos que o propio municipio asumiría o 33%, para realizar un proxecto que o concelleiro Enrique Vázquez calculou que se realizaría en tres meses e medio -- a razón de 560 horas de traballo total--. O traballo consistiría na "migración dos datos do software da versión 2.0 á 3.0 de 5.958 rexistros e actualización do inventario de 145 unidades de instalación", que levaría unha semana; na "catalogación do fondo emigración", que serían dous meses; na "catalogación do Libro de Emigrantes", que levaría unha semana e na "catalogación de 100 anos de actas do pleno", se se realizaría nun mes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.