O galego Dorado ascende á dirección das mocidades do PP
O Congreso das "Nuevas Generaciones" organizarase dentro de dous meses. Con todo, a dirección do PP acaba de filtrar o resultado final, tras a marcha de Nacho Uriarte. Vídeos no interior.
Por Galicia Confidencial | Madrid | 17/02/2011 | Actualizada ás 02:26
Nacho Uriarte, deputado condenado por conducir borracho, deixará finalmente o cargo. O relevo indicado a varias axencias polo equipo de Mariano Rajoy está formado por unha andaluza, Beatriz Jurado, que será a presidenta, e o galego Javier Dorado, próximo secretario xeral.
Javier Dorado substituíu a María Seoane como líder das mocidades do PP galego este verán. Dorado é estudante universitario e traballa no gabinete da Consellería de Industria, que dirixe o vigués Javier Guerra. Así se presenta nunha videoentrevista colgada polo PP:
Dorado foi líder das Novas Xeracións en Vigo, logo na Provincia e despois gañou o Congreso en Galicia, co apoio do aparato do Partido e integrando aos rivais. Este é un vídeo dunha campaña das mocidades conservadoras nas eleccións á Xunta, no que Dorado chama ao cambio repartindo propaganda e preservativos:
Agora parece que ocupará a secretaría xeral a nivel estatal, mentres que a presidenta será Jurado. Un respaldo ao peso do PP galego e o andaluz na maquinaria da rúa Génova. Velaquí os artigos de Dorado publicados no GC.
Uriarte, un ano como presidente malia ser detido
O mandato de Uriarte finalizou en setembro de 2009. Tres meses despois era sorprendido conducido baixo os efectos de alcol. Como é aforado, foi o Supremo quen o xulgou e condenou hai un mes. É dicir, o PP mantívoo á fronte das mocidades máis dun ano mentres se resolvía o caso coa previsíbel condena de retirada do carné e multa por 2.400 euros. O Congreso celébrase agora con dous anos de atraso sobre o previsto, pero meses antes das eleccións locais.
Cada ano morren no Estado 900 persoas en accidentes causados por condutores ebrios.
