Por Galicia Confidencial | Compostela | 31/05/2018 | Actualizada ás 15:23
"Vostede chegou ao poder en 2009 falando de austeridade e criticando os soldos do goberno do bipartito. Acaba de dicir que o máis importante nunha organización política é que teña coherencia nas súas actuacións e decisións políticas. Tendo en conta isto, respalda vostede que o seu partido apoie dous soldos que suman 100.000 euros a un ex deputado do PSOE na Deputación de Lugo?. Unha persoa á que ademais criticou xa duramente Ciudadanos".
Foi a pregunta directa que este xoves lle fixo Galicia Confidencial ao presidente galego tras o esperpento provocado por Manuel Martínez no pleno da deputación. Un Manuel Martínez que apoia o PP de Lugo na súa intención de recibir un salario de 57.000 euros para el e 41.000 para un asesor. Pero, a pregunta non lle gustou ao presidente galego porque, lonxe de contestala, aproveitou para ler unha resposta preparada na que o único que aludía era que o "espectáculo" provocado na deputación era motivado polo propio PSOE.
Así, o presidente galego destacou que na Deputación de Lugo gañou o PP, pero goberna o PSOE, que "xerou moito entretemento e pouca xestión". "En todo caso ese deputado -Martínez- era do PSOE, non do PP", insistiu.
"Pero non me responde. Está vostede dacordo en que o seu partido apoie soldos de 100.000 euros para esta persoa", insistiu este medio. A súa resposta, o silencio. E xa hai un dito popular que di iso de "quen cala, outorga".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.