O Camiño dos Faros comeza a ser famoso no Reino Unido

"O seu nome oficial é Costa da Morte". Así é como The Guardian se fai eco da paisaxe galega e a dá a coñecer no Reino Unido, sinalando que aínda que a xente diga que Galicia é coma Gales, non é tal. Na reportaxe descríbese un clima fresco, praias salvaxes, paredes de pedra seca e flores mariñas rosadas e moradas. E aínda que apunta a que todas estas son características compartidas coa rexión gala, existe unha diferenza: "a mesma costa está noutra liga, ten un profundo abandono da fin do mundo". 

Deste xeito, o Camiño dos Faros é descrito na reportaxe cun certo misticismo, nomeando anécdotas "máxicas" que aconteceron en diversos puntos da ruta. Por exemplo, no Cemiterio dos ingleses, o recinto de granito vermello onde descansan 173 mariñeiros do Serpent, un buque da mariña inglesa que naufragou en 1890. Nese punto é onde se detén James Stewart, relatando que alí atopou un ramo de flores frescas de segunda man e coma un epitafio apareceu un barco de tres mastros: "apareceu brevemente na escuridade gris da costa e logo desapareceu de novo como unha pantasma".

Doutra banda, no artigo tamén se relata cando apareceron no medio do camiño uns pescadores e asentiron coa cabeza un "bom dia": "o idioma galego é máis próximo ao portugués que ao español". E coma esta, na reportaxe relátanse outras anécdotas que aconteceron na ruta, ao tempo que se apunta á beleza da costa galega. "O seu nome oficial é Costa da Morte" repiten no artigo. "Esta é unha venta difícil para a xente de marketing, especialmente cando se compite coas famosas Costa do Sol e Costa da Luz", continúa. Por último, o artigo remata lembrando que "Costa da Morte" xurdiu dun artigo de 1904 nunha revista británica, despois doutro naufraxio.