Santiago e Vigo, entre as dez universidades que máis patentes solicitan en España
A da Coruña ocupa o posto 17 na clasificación elaborada pola Oficina Española de Patentes y Marcas, con datos acumulados entre os anos 2005 e 2017.
Por Galicia Confidencial | Santiago de Compostela | 27/06/2018 | Actualizada ás 17:09
As universidades de Santiago de Compostela (USC) e Vigo (UVigo) sitúanse entre as dez de toda España que máis solicitudes estatais de patentes fixeron entre os anos 2005 e 2017, entre as universidades públicas españolas, segundo os datos facilitados pola Oficina Española de Patentes y Marcas. En concreto, a USC sitúse no oitavo posto, con 238, e a UVigo, no décimo, con 191 solicitudes entre os anos 2005 e 2017.
Por enriba das universidades galegas sitúanse, por esta orde: Universidad Politécnica de Madrid (583 solicitudes), Universitat Politécnica de Catalunya (434), Universidad de Sevilla (416), Universitat Politécnica de Valencia (325), Universidad de Granada (262), Universidad de Málaga (248) e Complutense de Madrid (238). Entre a de Compostela e a de Vigo, no noveno posto, sitúase a Autónoma de Madrid (215).
A Universidade da Coruña ocupa o posto 17 nesta clasificación, con 152 solicitudes de patentes estatais entre os anos 2005 e 2017.
