Xornal confirma a marcha de Gómez adiantada por GC
O director caeu polas presións de Rajoy malia que a Constructora San José presenta o relevo como produto dun "mutuo acordo". Maria Val, até hoxe subdirectora, asume o cargo en funcións.
Por Galicia Confidencial | A Coruña | 02/04/2011 | Actualizada ás 11:43
A construtora San José confirmou hoxe nas páxinas de Xornal de Galicia o relevo de José Luís Gómez como director, noticia adiantada o venres a primeira hora da tarde neste diario electrónico.
Segundo as fontes consultadas por GC, foi o propio Mariano Rajoy quen desencadeou a caída do xornalista. O líder do PP chamou ao construtor para protestar pola publicación dunha foto súa nun barco dunha familia de históricos do narcotráfico en Cambados, publicada por Xornal. Máis detalles aquí.
Na súa nota, Xornal tenta que a marcha de Gómez non se perciba como un conflito por mor das presións do PP:
"José Luis Gómez, de mutuo acordo coa empresa editora de Xornal de Galicia e Xornal.com, deu por finalizada no día de onte a súa etapa como director de ámbalas dúas publicacións. Gómez veu desempeñando con marcada profesionalidade a labor directora, dende o inicio das dúas publicacións". A editora gaba ao Gómez, a quen cualifica de "periodista de raza e prestixio". Gómez posúe gran parte das accións da empresa, a que seguirá vinculado.
Mostra de que o relevo se debe a unha decisión non prevista é que Xornal nomeu a subdirectora María Martínez Val "directora en funcións". É dicir, non había ningún substituto previsto para Gómez.
A Wikipedia recolle que María Martínez Val comezou a traballar no xornal El Ideal Gallego (1991), para pasar rapidamente a Galicia Hoxe e a El Correo Gallego. Accedeu posteriormente, a comezos da década de 2000 ao grupo Voz, onde foi directora de comunicación do grupo e da Fundación Santiago Rey Fernández-Latorre. En 2008 foi fichada como subdirectora de Xornal de Galicia polo seu promotor José Luis Gómez, cando a fundación do medio tras lograr o financiamento de San José.
Con todo, máis alá de quen asume definitivamente o cargo, o que que máis preocupa aos traballadores é até que punto o construtor Jacinto Rey está disposto a seguir investindo nos medios.
Construtora San José suma ao fracaso do seu desembarco en A Nosa Terra, hoxe en concurso de acredores, un conflito que pode prexudicar a imaxe da cabeceira ante moitos lectores, pois Gómez tentou posicionar a Xornal como alternativa progresista e galeguista á prensa tradicional e agora o director cae, polo menos en boa medida, polas presións do líder do PP.
